羅文愛徒之一的容祖兒十九日晚趕返香港，不過，始終未能見師父最後一面。昨日容祖兒入商台接受訪問，她一身黑衫兼戴上有色太陽眼鏡的打扮，也掩不住紅腫的雙眼，她直言前晚返家後看到有關羅文的報道及特輯，忍不住哭個不停。
錯過告急電話 失見最後一面
雖然昨日記者與容祖兒的談話內容都離不開其師父羅文，但她表現得很堅強，沒有在記者面前落淚。只見她心神恍惚，偶爾扁扁嘴。祖兒透露前晚回港，其實再前一晚（十八號）她從台灣返港，然後轉機飛上海，在候機室停留一段時間，期間因太累睡着了，原來期間經理人霍紋希曾致電給她。打算告訴她師父病危的消息，但她聽不到電話響，否則她一定會出閘趕往見師父最後一面，錯過此機會惟有說聲「無緣」，但就感到很難過。
電話講拜拜 聽到呼吸聲
容祖兒到達上海後，始回覆經理人的電話，當時經理人問她是否想跟師父說幾句，祖兒即刻跟師父講電話。她說：「其實，我都唔知講咩，我同師父講，我係祖兒，多謝佢，講咗多次多謝，最後同佢講ＢｙｅＢｙｅ。」雖然師父講唔到嘢，但我聽到佢嘅呼吸聲好急促，知佢一定好辛苦，堅持咗幾個鐘，無用嗎啡針，好『勁』！不過，從另一個角度睇，都想佢脫離痛苦，師父同我講過，每入一次醫院就辛苦過一次。」
出碟給他過目 親手做份禮物
至於何時接到師父的死訊，祖兒自言沒看過錶，所以不大清楚。問到她可會如羅文的另一徒弟鄭伊健般送樣東西給師父，祖兒坦言；「我承諾過每次出碟都會俾師父過目，今個月我出過兩隻碟，之前師父危殆我返過來探佢，但唔記得俾張國語碟佢，真係好遺憾。所以，我好想親手整樣嘢俾師父，呢樣嘢唔係就咁喺街買得到嘢。
希望師父報夢 想與他傾吓偈
聽到師父離開的消息，祖兒坦言哭過很多遍，「在上海時一個人看電視見到師父嘅嘢有喊，我好怕做訪問講師父嘅嘢，我怕講唔到……，心情真係唔知點，尋晚睇電視又係好唔舒服，睇番師父喺十大中文金曲致敬獎講嘢好無奈，真係好心痛。」問到無見到師父最後一面會唔會好失望？「無緣份……，希望發夢可以見到佢，想同佢傾吓偈……」祖兒又突然有感而發；「我好唔鍾意癌症，好多親友都係呢個病，所以大家要好好保重，愛惜身體。」
師父有給吩咐 為肝病人做事
羅文離開後，祖兒身邊少一個愛錫她的人，她聞言即雙手托頭；「師父用好多實際行動、語言來鼓勵我，又在人面前讚我，又話我唔肥，唔使減，鍾意食就食，次次去佢屋企都大魚大肉。師父講嘅嘢一Ｄ都唔肉麻，係好溫暖自然，之後又捉住我隻手叫我一定要做好Ｄ，有咁好得咁好，羅記鍾意人做得好，身為佢徒弟應做Ｄ佢想做嘅嘢，佢實會好開心。我聽人講師父希望我幫肝炎病人做Ｄ嘢，我會留意呢樣嘢。」
要帶鴨舌花生糖 送師父最後一程
說到羅記曾表示不喜見人喊，祖兒亦表示大家應該堅強點，當羅記去了旅行，去了很遠的地方。羅記喪禮當日，祖兒也會依羅記的吩咐穿得漂亮點，帶備他最喜歡的鴨舌、花生糖。至於可擔心到時控制不到情緒，祖兒說：「到時先算啦！」問她會否送師父上山，祖兒即反問；「女仔送得咩？」記者說人人都得，她表示要問問意見。之後，祖兒就扁扁嘴說希望帶住笑容送師父最後一程。有說羅記不欲大家見到他瘦的樣，祖兒謂；「師父病得咁嚴重，佢捱得已經好叻啦，仲顧得咁多嘅咩！」