容祖兒因梁思浩遇襲一案被警方拘捕協助調查，令祖兒大半個月來精神飽受困擾，身心疲累，尤其是心靈上造成極大傷害，不過昨日祖兒終於飲得杯落，一天都光晒，因為她獲警方撤銷擔保無條件釋放，前日祖兒已先就事件聲稱自己是無辜，如今總算還她一個清白，跟祖兒同屬英皇唱片公司的眾師兄弟妹獲知這個消息後，都為她感到高興
，而師傅羅文，更指摘警方在是次事件處理不當。
容祖兒的師傅羅文對徒弟獲警方還她清白，羅記（羅文）話：「我一啲都唔驚奇，一早都知道祖兒冇事，佢點會有事，一個細路女壞得乜，最壞嘅朋友都係我。（覺唔覺得警方拘捕祖兒係錯誤？）警方應該搵個腦諗吓嘢，上次拘捕佢嚴重咗，應該係搵佢協助調查。」
名譽損失好大
羅記繼續為徒弟申冤，他話：「祖兒始終係細路女，為今次件事搞到佢好唔開心，寫到咁大標題，其實警方當初應要考慮番個後果，始終拘捕可大可小，如果祖兒有咩事邊個養佢？係好大嘅名譽損失，得嗰廿一歲女，如果萬一衰咗唔好彩，所有工作取消晒，咁警方係咪養佢一世。（今次係咪警方疏忽？）唔知道，總之祖兒有乜損失，警方就要養佢一世，（祖兒有冇向你報告呢個好消息？）唔使講，唔需要。」
師姐妹齊支持
此外，祖兒的師姐妹葉佩雯、張佳佳、Twins昨日一齊出席「FUNFUNSHOW之聖誕親子樂園」記者會時，聞得祖兒獲警方撤銷擔保，都戥她高興。葉佩雯話：「我會打電話俾佢鼓勵吓佢，好開心，因為呢件事搞咗咁耐，依家有個水落石出，冇咁大困擾，唔使咁辛苦、咁大壓力，可以輕鬆啲錄音，專心工作。」
張佳佳：「咪好囉，係好事，可以繼續工作。」而Twins則話：「幾時嘅事，我哋唔知，咁咪好囉，恭喜晒佢，見到佢面時會問候吓佢。」
曾跟祖兒合作過拍戲的楊千嬅都替她開心，千嬅話：「好！好事，佢咁慘，之前咁大壓力，希望佢快啲好番，養好把聲，遲啲開演唱會。」
阿姐不願置評
汪明荃和沈殿霞先後因為梁思浩被襲事件，曾經落過口供協助警方調查，昨日兩人得悉容祖兒得到警方無條件釋放，都不欲多談。阿姐（汪明荃）話：「我要做嘅已經做晒，落咗口供，冇嘢講。」肥姐（沈殿霞）話：「我未睇報紙，我唔知，不願置評。」