羅文昨日頭七，但突然有消息指英皇雖然會負責羅記喪禮的費用，不過卻以包底形式，如果超出一個數目費用便要向其他人籌集，此外，亦要將帛金收回來扣除有關開支。記者就此事向英皇求證，英皇行政總裁吳雨強烈否認此說，他表示：「今次喪禮所有費用全部由楊生（楊受成）負責，根本不存在包底的情形，而所有帛金亦會全數交給羅記的家人，希望大家尊重羅記，唔好再講啲咁核突嘅嘢。」
至於阿倫和阿叻等為何不在治喪委員會名單及扶靈名單內？吳雨表示：「每次治喪委員會開會之時總有二十多人出席，楊生從來冇干涉過任何決定，大家可以向其他人詢問，現在所有人都只是想全心搞好羅記的喪禮，希望唔好再有是是非非傳出。」
係一個無價嘅葬禮
而羅記的前助手Terry昨日接受查小欣訪問時亦強調：「希望外界不要再着眼羅記的喪禮用咗幾多錢，今次係好多朋友出心、出力、出錢去為羅記做事，呢個係一個無價嘅葬禮，唔可以用錢衡量，總之係風光大葬。」
此外對於外界不少猜測，Terry一一作出澄清：「雖然我哋不設公祭，但係好歡迎羅記嘅朋友及Fans（據甘菁菁事後解釋，所謂Fans只係經常來往的一班歌迷朋友。）到靈堂致祭，因為羅記最鍾意熱鬧，今日係羅記頭七，我哋一班好朋友會為他在佛堂誦經，等大家靜靜咁為佢做一啲嘢。」
唔好用羅記名搞嘢
至於有人提議在獅子山下建紀念館，Terry表示：「近期經常有人搵我哋，話搞乜乜基金或者用羅記個名起呢樣搞嗰樣，總之呢個時間我哋只想搞好個喪禮，唔會咁快有決定，況且亦唔想亂用羅記個名籌款，至於骨灰係唔會撒喺佢最鍾意的地方，因為火化完之後，骨灰所剩無幾，再分的話便不能聚集，不過始終要尊重他的家人意願。」
昨日羅記的家人在傍晚時分返回跑馬地寓所，對於籌錢的傳聞，她們一概不答，而羅記家姐更一度黑面的驅趕記者，指各人阻住她們返家。
至於昨日是羅記的頭七，據知他的一班好友選擇了在跑馬地正覺蓮社內為羅記做法事，並由覺光法師主持儀式。