抗癌鬥士羅文自七月底在瑪麗醫院做完化療後，病情日漸好轉，不過體重急劇下降，貪靚的羅記為免傳媒拍下他的瘦削樣子，個多月來都過着深居簡出的日子。至昨日，他終於打破心理障礙，不理傳媒追訪，大方外出，去完灣仔飲茶再去中環買VCD，勇敢面對記者鏡頭，雖然樣子瘦得令人擔心，但舉動卻龍精虎猛，不屈精神令人敬佩。
昨午十二時半，羅記在好友張徹太太、助手阿東和大陸親人陪同下，坐車去灣仔「車氏粵菜館」飲茶。當羅記發現記者追訪時十分愕然，即時反應用手遮臉急步入。穿起長袖軍褸的羅記，雖然背影很瘦，但步步有力，一支箭衝入即背向記者而立，逃避鏡頭。
喜似玉置浩二
兩小時後，羅記歎完茶搭着蓋鳴暉膊頭從正門出來，面露笑容大方給記者拍照，顯得精神奕奕，之後再去中環逛影碟舖。當他落車時忽然下大雨，阿東即乘機擔遮擋着鏡頭，豈料被中氣十足的羅記薄斥：「遮乜鬼，唔好遮。」任記者影相之餘，還友善地接受訪問，令記者喜出望外。
記者讚清瘦了的羅記有點似玉置浩二，他聞言哈哈大笑，表現開心，羅記說：「成日喺屋企騰東騰西太悶嘞，好想出街行吓，俾你哋影到都唔怕。」羅記見記者拍他的DVD，還貪得意叫記者給他看，羅記邊看邊笑着說：「唔，都唔係太瘦啫，ＯＫ啦，揀靚啲嘅相登呀！」
空氣好便出街
羅記在唱片舖買了五隻VCD，包括：《生日女郎》、《Iris》、《忘我情緣》、《老電影精選——太太萬歲》和《Sabrina》，另外本還想買《Funny Face》、《戰爭與和平》等電影卻無貨，惟有叫店員記下戲名，有貨就通知他。記者問羅記會否去Shopping？他抵死地答：「唔買嘞，買乜鬼呀，都冇騷做。（呢排咁多演唱會去唔去睇呀？）唔睇囉，夜晚好攰，行多陣都攰，休息好過。（會唔會多啲出街呀？）睇精神啦，空氣好咪出街囉。」之後羅記便返家休息。