從來沒有見過一個患病的人，可以像羅文那樣，如此樂觀、積極，就是這樣才令身邊朋友忐忑不安的情緒稍稍放寬。儘管大家仍然為他擔心，甚至有傳他只有半年壽命，但各人卻沒法子不被他笑看人生的態度所感染，連唱片公司的同事亦如常為他安排工作。籮記（羅之暱稱）得悉不實傳聞後，勞氣的說：「我點止得半年命呀！」現時籮記沒有一刻當自己是病人，無懼受病魔折磨，依然會扮靚靚出街，開心、積極走前面的荊棘路！
這陣子，大家都關注患上肝腫瘤的羅文的病況，記者每日站在他家樓下，陪着他飲下午茶、吃晚飯和去醫院檢查。
最近本刊記者與籮記通過電話問候病況，他對每日均有不少記者陪着他出出入入，他甚為體諒說：「啲記者要做羅文日記，無法子啦，佢哋都好辛苦，反正我有咁多靚衫，咪日日着得靚靚咁出嚟畀大家影囉，我最鍾意靚啦！其實知道自己患病開始，我無當過自己係病人，行出街啲人見到我都話：『係咪，羅文咁精神邊似有大病吖！』」
事關羅文用非常積極的態度去面對，他堅信這場仗會以最漂亮的姿態來戰勝它。現時籮記主要以中藥醫病，說到病況，他還說笑的說：「我啱啱食完一劑中藥，痾咗一大篤屎，好正！好舒服，依家我睇緊中醫，呢種病千祈唔好開刀，一開刀就會擴散，我好信中醫，但係每星期都會照樣去醫院檢查，ｃｈｅｃｋ住個瘤細咗幾多，不過暫時唔做得劇烈運動。」
話雖如此，羅文為了要保持靚靚身形，以前每日均會去馬場跑步，現在雖暫時不能郁動太大，但他仍有好辦法：「唔跑步，我都會喺天台做吓運動，因為啲肌肉鬆咗，着衫唔好睇！」
我唔怕死
羅文的樂觀態度，確實感染好多人，「我咁積極、咁樂觀。個個人都讚我叻，佢哋話換咗係第二個人，無可能有咁樂觀。我無當自己係病人，其他人都應該係咁，講真吖，人人都會死啦，我無驚過，一個人健健康康都會有意外啦，但係生時要活得開心至得！我堅信癌症可以醫得好，之前有報道話我得番半年限期喎，我點止有半年命呀，咁鬼黑心嘅，我死咗對佢哋有乜益處，我死咗佢哋好開心咩，我咁積極，唔讚我仲要亂噏，真係過分！」
本來羅文於五月份會到台灣頒獎，之後再為新國語唱片宣傳，如今因為有病在身而延期，但他還希望這兩個星期病況進一步好轉，那麼他的台灣之行便可如期出發！看來連唱片公司的同事也被他感染，如常為這位大家尊稱他「老爺」的羅文大哥安排工作！
貪靚三十年
今年五十一歲的羅文，雖然已公開承認身患肝癌，但從他所說「肌肉鬆咗，着衫唔好睇」和「咪日日着得靚靚出嚟畀記者影囉」便看出籮記天生愛美。事實上，自從他在６７年組成「ＲｏｍａｎＡｎｄＴｈｅＦｏｕｒＳｔｅｐｓ」樂隊而入行後，這三十多年來，籮記每一次演出、每個形象都力求最美，甚麼姣ｌｏｏｋ、日本ｌｏｏｋ、軍ｌｏｏｋ……甚至全裸都出齊，實在經典之極。