羅文大病康復，英皇娛樂Music Plus唱片公司特別為他舉行派對，一方面令他玩個痛快，亦籍此宣傳剛推出兩星期的新碟，而畀面出席的好友眾多，仙姐白雪仙早於八時許已經到場，其後謝君豪、梁李少霞、丁菲菲亦有出席。
最令羅記感動是正在忙於「煙雨紅船」演出的老友陳寶珠、梁家輝、劉嘉玲，在舞台劇收工後立即趕赴宴會，一到場就關心羅記的健康情況。
盛會更少不了老闆楊受成，為表示對羅記的重視程度，好大手筆送價值一百二十二萬的藍、綠寶石鑲鑽手表，羅記收禮物後雀躍到擰住隻表逐圍枱走，展示貴重大禮，但又拍拍心口話：「真係好驚，老闆送咁厚禮，唔知隻碟賺唔賺得番呢！」
其實前晚羅記身上所晒的「行頭」都有不少，加上鑽石表首飾總值超過三百萬，手上戴有分別也是三卡幾的兩隻鑽戒、鑽石手鏈，鑽襟針！而為配合唱片風格，派對揀在麗晶酒店上海餐廳進行，布置極有懷舊色彩，羅記更獻唱新碟內幾首歌。《夜上海》、《給我一個吻》、《我要》、《今天不回家》、《假正經》等，在台上唱歌時簡直投入到忘記自己大病初癒，更走到每一席嘉賓面前搔手弄姿。獻唱期間英皇更特別安排四位中、西美女獻花吻賀，氹得羅記好開心。
羅記話：「老闆同我講，大難不死必有後福，唱片大賣呀！原本今日仲請咗張曼玉、梁朝偉、鞏俐，但佢哋唔喺香港，不過亦打咗長途電話畀我，有咁多朋友關心真係好難得！」雖然羅記精神狀態已回復，但仍然要繼續食藥，因為基本上是未完全復原，見他前晚依然煙不離手，羅記話：「醫生叫我戒煙，但我唔食唔得！我已經戒咗酒，而家飲水為主！我之前因體內血瘤爆咗搞到卅六吋腰，亦收番好多，而家卅吋腰。」
對於最近的新唱片，羅記話除了香港，其實主力是大陸及台灣市場，遲些便到大陸做宣傳。之前羅記話他這張唱片決定「六親不認」，朋友要求送碟一概拒絕，要大家出錢買，甚至救他命的三個醫生亦不送，但他為了葛蘭就會破例，葛蘭聽過他唱《我要》，讚他有風格，還相約好日內食飯呢！
羅記說：「呢張碟就連助手阿東都要自己買！（但阿東係你嘅救命恩人喎？係咪會養佢一世？）應該嘅，我知道邊嗰對我好，其實我送咗一隻四卡鑽戒畀佢喇！」記者亦即時拉住阿東睇他手上羅記所送的鑽戒，搞到阿東好尷尬呢。