好嘞，執筆之時，一九八七年度十大勁歌金曲第一季選舉，已經做完，身為其中一位司儀，想講下嗰晚嘅感受。
首先，季選本身有兩項係打破咗歷季嘅紀錄。第一：候選歌曲一共有四十三首咁多；第二：一共有十一首歌入選，一向都係十首，今次多咗一首，係唔係破記錄先？
嗰日，由下晝開始就彩排，最先彩排嘅係壽星女林憶蓮。呀！差啲唔記得多謝佢臨走送咗個芒果畀我，好甜呀！
憶蓮嘅歌藝同台風進步唔少，難怪能夠喺咁多青春偶像之中脫穎而出！
跟住係羅文，如常地準時出現，認眞嘅排練，令我對佢越嚟越佩服。
啱啱出道，就入選嘅劉美君，精神奕奕咁嚟練排「最後一夜」，又唱又跳，好多人認為佢好有潛質，可以繼續去，你哋點睇？
每次見陳百強，都會留意佢身上衣着，仲記唔記得佢某次季選戴兩隻手錶，某次季選又着破爛嘅牛仔褲，但係都成為潮流帶領者。今次佢又以一件孖襟西裝配條濶到無倫嘅黑布褲，潮流會否跟風？拭目以待！
阿Ｂ如常地風趣，有首古怪有趣嘅非洲黑森林入選，當然開心喇！值得一提嘅係佢後來幫阿倫首ＭＡＧＧＩＥ做色士風手，極有台型，相信大家都知佢吹色士風好叻架！
阿倫個人連中三元，正如佢自己講：「有冇搞錯，連汁都撈埋？！」不過又抵佢嘅！所以冇人有異議！
有人奇怪：點解張學友係首「別戀」入選而唔係［藍雨」，唔出奇吖，「別戀」紅先㗎嘛！祝學友仔演唱會成功先！
張國榮係最後一個嚟彩排，正式嘅時候又唱先，唱完又先走，似乎有少少事咁。願張國榮繼續努力。
在此，恭喜所有得獎歌手，第二季努力啲添！