由香港電台主辦嘅第九屆十大中文金曲頒獎音樂會，已經喺一月十號舉行過。
係邊十首得獎，相信唔駛我喺呢道花篇幅再講一次。
今次我想講嘅，係幕後所見嘅一啲花絮。
首先，係有感而發，我覺得香港嘅藝人，紀律性同埋專業性越來越高，越來越好。尤其幾位喺樂壇已經有好一段日子嘅前輩，就更加有專業精神，淨係講守時呢點，已經令人佩服。
好似羅文咁吖，一早要十點到達紅磡體育館排練，十點零一分，已經見佢坐咗喺度，隨時預備排練，而張國榮都唔差，晨咁早就坐喺度等我哋，甚至早餐都食埋，個個學佢咁，就認眞天下太平咯。
仲有一個唔可以唔講嘅，就係梅艷芳，嗰晚，不斷有消息傳來，話佢患咗腸胃炎，隨時唔出得，於是後台就連忙同司儀執生、改稿，到咗正式出街前一個鐘頭，阿梅由佢班草蜢仔參扶之下，趕到現場。
大家一見佢個樣，嚇咗一跳，因為佢病得真係好重，根本就唔可以出場表演，大家都勸他休息，唔好出。你估佢點講？
阿梅話：「既然我可以上台領獎，我就一定要唱埋佢，我唔想班歌迷以為我詐諦！」
結果？阿梅仍然手舞足蹈喺台上面唱咗佢嗰首愛將，大家睇到拍爛手掌，不過，後台每一個關心佢嘅人，都戥佢肉刺！
本地樂壇有一班咁有責任感嘅歌手，實在係大家嘅福氣。
就係嘞，以後捧佢哋場，一定要戮力啲，大力拍手掌呀，知冇！？