羅文逝世後，親友繼續為他的身後事奔波。而羅文生前曾在訪問中透露過，對死後喪禮的一些遺願，以及患上肝癌後他亦沒有立遺囑，昨日商台《查煲裡的茶篤撐》播出有關訪問聲帶的內容。
兩年前的５月，羅文尚未患上絕症，他戴上名貴首飾到電台接受訪問，當時羅文透露有很多珠寶首飾，暢所欲言身後事，還主動講笑話。
聲帶中的羅文開心說道：「有次跟朋友去跳舞，我叫佢哋記住，第日我『瓜』（死）咗，我都是這樣喜歡玩，我幻想有病時會是怎樣，一定會迴光返照好精神。這晚我會叫齊所有朋友同我跳舞，然後跟大家講『我瓜喇』，快些同我跳舞！」又說：「想要遺產就同我送終，翌日瞓在牀上，朋友到齊，我在保險箱拿出所有珠寶，然後派清光，大家開心，我就瓜！」
羅文又說到理想中，自己身後事的情況：「仲有，去靈堂的人要著靚衫，不可以穿波鞋、背囊、牛仔褲，咁樣入去即刻打摔角（踢佢走），同埋唔畀喊，（衣服）七彩唔緊要，要放Rave音樂，大家happy送終！」
「一定要火葬」
羅文繼續開心說：「一定要火葬，千祈不要埋我落地下，最怕黑暗、最怕有蟲蛀我，（不怕火嗎？）燒了我乾手淨腳，將我的灰灑勻在我喜歡的地方，但不可以灑到海角，好似鬼係度飄，唔制。最好是在我喜歡的戲院、鋪頭每處灑一執，畀我有多啲地方玩吓。如果我『瓜』了，朋友、死黨不是照這樣做，我一定變鬼晚晚來搞你，埋我落地唔火葬，你有排死！我實返嚟搵你！（百無禁忌？）講下就會死咩。」
情歸吃唱玩樂
當時羅文以樂觀心境談到死後的意願，萬萬料不到兩年後的今日竟大派用場！羅文在患肝癌之後，從來沒想到會給病魔擊倒的一天，一心以頑強鬥志打勝這場仗。所以他在本年８月２９日接受訪問時，也透露了沒立遺囑。當時問他有否立遺囑，羅文道：「無，啋過你！我啲首飾咁靚，都未戴夠，點解要分畀人！想都無想過，應該放長線去睇，我無病嘅，人需要意志，個個都話我好，醫生護士都好錫我。」
談到羅文情歸何處？他說：「吃、唱、玩、樂，有時會拍散拖，朋友都羨慕我沒有結婚。我知自己大使（揮霍），結婚做乜，我又怕細路仔。」
遷移故居鍾馗像
羅文逝世已四日，昨日下午４時４５分，跟隨了羅文８年的菲籍司機Joe Devera，在羅文的蟠龍道故居帶著一袋物品和一枝高爾夫球棍離開。記者所見，羅文的寓所比早前整潔，相信有人已開始為羅文執拾遺物，之前一直放在羅文家中的鍾馗像亦不見了。下午５時３０分，張徹太太亦離開羅文寓所，而羅文的姊姊則一直留在家中。