容祖兒未當歌手之前，已經跟羅文學唱歌，羅記十分疼錫她，視她如親生女兒般。逢過年等大時大節兩人定必一起慶祝，有如一家人共聚；當公司勒令祖兒戒食減肥，羅記不時偷偷拿點心給她吃解饞。憶起與恩師的一切，加上無法趕見最後一面，祖兒忍不住放聲痛哭……
記者千辛萬苦找到從上海飛到北京的祖兒，要求她強忍眼淚，執筆向師傅作最後的致敬。
二○○二年十月十八日，我永遠都不能忘記這一天！
下午，我從台灣趕到上海，突然接到同事電話通知，我最敬愛的羅文師傅已經去世，當時我心情極之低落，躲在一旁哭呀哭。不久，又接到另一個電話通知，原來剛才的消息是錯誤的。不過，他可能隨時會離開，叫我有心理準備。
我知佢認得我把聲
唔能夠趕返嚟香港見羅記最後一面，我覺得非常遺憾。我隔着電話筒對佢講：「多謝你，你教我嘅嘢，我會永遠都記得！我會乖……」然後已經說不下去。我知道佢認得我把聲，聽到我講嘅說話。
此際，我腦裏泛起好多與羅記一齊時嘅片段：我還未成為歌手之前，羅記俾機會我做佢演唱會嘅嘉賓，又帶我去大西洋城、美加等地登台，將我介紹俾觀眾，培養我嘅自信心，帶我真正踏入娛樂圈。
捉住我手話好開心
記得今年中秋節，我哋好多人去晒羅記屋企天台賞月、食月餅，我幫佢嘅天台布置，掛起好多燈籠，逐個逐個燈籠點着，真係好靚。羅記捉住我隻手，同我講：「我好開心！」我永遠都記得佢呢個笑容同埋呢一句說話。雖然當時羅記已經好瘦，氣若柔絲，但佢呢個笑容，係我記憶中見過最燦爛嘅！
能夠做羅記嘅學生真係好幸福，佢會將所有識得嘅嘢，毫無保留咁教晒俾學生，佢唔止教我唱歌，仲教我好多人生道理。喺佢身上我學識樂觀、堅強嘅性格。我真係好敬佩羅記，直至佢要離開大家之前的一刻，佢依然好堅強、好樂觀，成日眼仔碌碌，令大家更加愛錫佢。
要好似你一樣咁叻
最後，我希望同羅記講：師傅，Bye Bye！我會努力做好我自己，我會將你教我嘅所有嘢好好發揮，將你嘅精神發揚光大。我要好似你一樣咁叻，成為一個受所有人都敬佩嘅藝人。