無綫為紀念羅文，除了昨晚於電視城直播《獅子山下歌聖隕落》外，今晚十時至十一時，將會重播羅文音樂特輯「弦曲情繫俄羅斯」，而「娛樂大搜查」由周一開始，會跟進報道羅文身後事。
而在昨晚的悼念節目中，出席藝人包括羅文生前的一班好友，包活鄭少秋、曾志偉、汪明荃、陳百祥、陳潔靈及曾經為羅文伴舞的「豹小子」成員陳小春，而遠在上海的沈殿霞接受電話訪問時，則喊到失聲，同樣，汪明荃與米雪在回憶與羅文合作時，幾度忍不住哭出來。
肥肥以長途電話講述羅文最後一次入院時的情況，最終難忍悲慟，說到中途已哭到失聲，她表示：「羅記由頭到尾都堅持唔打嗎啡針止痛，我問佢頂唔頂得順，佢又點頭，但我知佢一直都好唔舒服。之後佢同我哋講話佢腳痛，我就同Amy、Janet幫佢揼骨，劉培基仲笑話『睇你有三個婢女嚟服侍你』，羅記就喺度笑，欣兒又叫我代大家錫佢，等佢知道大家都好錫佢，我錫完羅記之後，佢笑到好開心，其實我覺得佢笑到好淒涼……」肥肥說到這裏已經喊得失聲，再也說不下去，而身邊的志偉和阿姐更是邊聽邊流淚。
佩服不屈毅力
汪明荃在鏡頭前一直表現堅強，但鏡頭後卻不時拭淚，當節目訪問身在新加坡的米雪，憶述羅文與他們合作舞台劇《白蛇傳》的往事事，米雪和汪明荃都忍不住哭了出來。汪明荃說：「羅記冒住扭傷頸骨嘅危險，努力不懈練習一招『殭屍倒地』，嗰股毅力令人十分佩服……羅記第一次喺利舞台開演唱會邀請我做嘉賓，雖然當時我喺電視圈好紅，但喺歌唱界我仲係新人，羅記就以《Roman & Lisa’s Show》命名，好溫暖好體貼。」
當汪明荃做完特輯後，立即衝入廁所痛哭，喊完才接受記者訪問。她表示做這個節目好辛苦，又大讚羅文對人好好，好似今年她做乳癌手術，羅文有病在身，都有來看她。而陳小春做完節目後，即接受「全線大搜查」訪問，但他只是一直頭耷耷，最後更哭了起來，只表示：「我會做啲嘢俾佢睇，我唔想講太多。」
樂壇一個典範
至於曾志偉原本身處內地，但應何麗全急召，儘管已換好球衣出場踢波，但也匆忙趕返港擔任主持。對於羅文離去，志偉表示非常惋惜，因為他的為人相當好，而且金曲具代表性，將歌曲帶到有中國人嘅地方，他說：「佢嘅歌曲對香港的年輕人都好有鼓勵性，係好正面嘅歌手，喺樂壇係一個模範。」志偉透露早期曾探望羅記，後期則不想再打擾他。
另外，節目中卻未見羅文的同事及一班徒弟，英皇藝人部總監霍紋希就此表示：「我哋公司嘅歌手大部分都唔喺香港，容祖兒同陳奕迅去咗北京做Ｓｈｏｗ，王傑喺台灣宣傳。祖兒同伊健係羅記徒弟，所以請佢哋兩個，不過佢哋因為另有工作在身而無暇出席。」
此外，據無綫外事部助理總監曾醒明透露，羅文由七○年開始簽約無綫，直至九九年十一月約滿，由於雙方關係良好，羅文在約滿後仍經常以嘉賓身分亮相無綫節目，而羅文對演出慈善節目更是不甘後人，故無綫對羅文逝世表示深切惋惜，認為是演藝界重大損失，因為多年來羅文帶給觀眾不 少歡樂，其逆境求存精神永留人心。