羅文（羅記）自五月尾傳因腫瘤爆裂而秘密入住瑪麗醫院接受止血治療後，他以個樣唔靚為理由，拒絕和傳媒見面，修心養性留在家同助手阿東邊睇世界杯邊大吃大喝，而阿東就一直向外界表示羅記身體日漸康復，但由於羅記始終未有現身，故不停有羅記病情反覆的傳言傳出，直至昨日記者終於透過阿東首次和羅記直接通電話，電話筒傳來羅記中氣十足的親切聲音，和記者足足傾了近十分鐘之多，唯一令人感擔心的是，羅記的聲音有點沙啞。
已瘦了十幾磅
昨日羅記如常在家睇波，見阿東與記者傾電話傾得興奮，也接過電話講埋一份，羅記的聲音響亮地說：「我而家睇緊波呀，我冇乜事，多謝關心，之前嗰啲傳言，你哋唔好信呀，我只係有幾聲咳，咳到有啲血，加上又腸胃炎先入院啫，因為腸胃唔好，食咗嘢落肚都吸收唔到，我而家有一百四十磅，係瘦咗十幾磅，瘦喺塊面度，唔靚嘛，靚啲先見啦。（想唔想出街呀？）唔想，香港空氣好污濁搞到我都唔想出街，而家我喺屋企日日都吸氧氣機，得閒就吸，成個人都精神晒，但呢啲唔係藥，只係氧氣，可以幫助我呼吸好啲啫。我都想打開個窗吸吓新鮮空氣，不過又怕咗你哋，搞到我窗都唔敢開。」
暫時不可搭機
問到羅記何時會往成都普照寺吸靈氣？羅記話：「暫時都唔會啦，醫生話我仲未搭得飛機住，都要休息先。（咁陳伯間新舖開張有冇送禮物呀？）我都唔知陳伯新舖開張，而家唔可以上山吸靈氣，惟有匿喺屋企吸氧氣啦，所謂家中添置氧氣筒，日吸夜吸精神好。」
而阿東又一再補充說：「大家唔好誤會羅記吸氧氣就以為個病好嚴重，其實呢部機幾年前喺香港已經好流行，呢部機喺瑪麗醫院都有用，每月租用費用為六百元，好似一部抽濕機咁大。」