羅文果然係英皇一哥，地位與眾不同，下個月二月十一日（即年三十晚）是羅文「年年廿八歲」的農曆生日，英皇老闆楊受成有見是羅文病愈後第一個農曆生日，覺得要大事慶祝一番，已決定將於二月八日假中環麗嘉酒店，舉行一個過百萬的生日派對，屆時除包了一個可容納百多人的餐廳，還會有Live Band助興，以便到賀的群星唱歌跳舞。
生日菜式方面會揀中式菜，實行鮑參翅肚，大魚大肉，而且還有頂級紅酒任君品嘗，而羅文在圈中人緣一向好好，據知全港紅星包括：梅艷芳、張國榮、劉嘉玲、肥姐沈殿霞、鄭伊健等二、三十位藝人歌手都會參加羅文的生日派對。
開腔唱歌
昨日於家中休息的羅文，在電話中直認老闆楊受成為他開派對，他開心的說：「係呀，你點知呀？係前幾日老闆楊生打俾我，佢話下個月就係我生日，點都要沖喜吓喎，所以咪搞個生日會囉，其實楊生個個都錫，等我好番，大家一齊賺大錢。（有乜生日願望呀？）梗係身體健康，快啲好番啦，生癌唔同感冒，而家喺康復中，唔可以忽略。
（咁有咩人嚟賀你呀？）嚟得嘅都會嚟囉。（點解唔正日搞呀？）正日係年三十晚，個個返屋企食飯，鬼睬你咩，都係早幾日之嘛。（咁你會唔會唱歌呀？）梗係會啦。（有酒飲喎？）都只係味一味啫，唔會飲多，我知邊啲對我有益，邊啲對我有害。」
超高貴造型
而羅文的助手阿東表示羅文屆時會以超高貴、靚仔造型出現，一定會令全場有眼前一亮的感覺。