羅文是屬於舞台的，屬於樂迷的，給他最快樂及最大的支持，亦是舞台及觀眾。
據聞，羅記現時最大的心願就是在紅館舉行個人演唱會，因為紅館留下他最快樂、最光輝的回憶，而且在萬多位樂迷面前演唱，亦是他最興奮難忘的事。有消息指出，羅記在家中接受治療期間，曾向楊受成要求，希望他能達成他在紅館開個唱的心願，而楊受成亦一口答應了他，並一聲令下通知唱片公司人員立即在紅館物色多個不同日子的檔期，以方便羅記若健康許可隨時舉行演唱會。
楊生心軟答允
按照原來工作計畫，羅文目前應身在台灣宣傳唱片，但因證實患上肝癌後，英皇立即把他所有工作全部取消，但他一向以工作為樂，況且他不想把自己視為病人，很希望如常工作，所以在家中接受治療期間曾多次向楊受成要求恢復他的台灣之行，但被楊受成拒絕，要他專心留在香港醫治，直至近日，羅記再向楊受成透露現時最大的心願就是在紅館舉行個唱，並希望他可達成他的心願，楊受成心軟之下，一口答應了他，但一定要他身體狀況精神健康之下方可舉行。
驚人話博宣傳
記者就以上傳言求證英皇董事總經理鄭堯強，他坦言承認的確正在安排羅記舉行個唱，他解釋：「其實羅記一直都有咁嘅計畫及要求，早於今年初羅記已想今年開演唱會，到三、四月他再提出要求，點知突然有呢樣嘢（肝癌），楊生講過只要羅記精神好，任何時間舉行都冇問題，公司上下所有人一定支持他。」
羅文昨日在電話中愕然地表示：「你哋點知？唔……等我好番先啦，費事人哋以為我做宣傳，依家已經好多人唔信我有病，我會好有壓力。」
屙黑屎腳仔軟
羅記現時正專心安在家中接受一位「神醫」的中醫治療，並且已有三日沒有出街，但似乎效果不錯，羅記在電話中接受本報記者訪問聲如洪鐘，還開朗地笑說：「呢三日因為食咗中藥，屙黑嘢（屎），屙到腳仔軟。」對於封小平表示想介紹北京一位特異功能師給他，羅文講笑說：「唔使啦，我已經有三十幾個名醫，另外朋友又介紹廿幾個，但命只得一條，腫瘤就得一個！邊睇得咁多！」
王傑指羅記上台就似叉足電
楊受成為達成羅文現時最大的心願，答應為他舉行個唱，並馬上為他安排及計畫，而身為羅記的好朋友，如：蔡一智、肥姐、王傑、容祖兒及張耀榮，都表示大力支持他，祝你演唱會成功——羅記！全世界都在支持你！
王傑：「羅記幾唔舒服都好，只要上到台他就好似叉足電，佢嘅動力係來自觀眾，呢個係佢嘅心願，我好支持他舉行。」
沈殿霞：「呢個係羅記嘅心願，幾大都支持佢啦！我相信佢都應付到，之前佢都有同我提過吓想同一班好朋友一齊開演唱會，到時我得閒都會參加，擔唔擔心佢體力應付唔到？好多嘢都唔到你諗嘅，既成事實就要面對，有病最緊要及時睇醫生，完成心中嘅心願囉！」
蔡一智：「我絕對尊重及贊成，但我都會擔心佢嘅體力係咪可以支持到，不過，我相信，只要羅記站上舞台，他絕對可以變得龍精虎猛，佢唔係普通嘅藝人，有病都可以咁樂觀，我相信佢絕對可以應付。」
容祖兒：「我最希望、最『恨』師傅（羅記）可以俾我做嘉賓，就算冇得做嘉賓，我都會去睇，我對師傅百分百支持及信心！」
張耀榮：「如果羅記要人幫手搞演唱會，我一定會幫手，無論揼幾多錢，我都一定要將演唱會搞得好好睇睇，做到最好，呢個時候唔係為錢，而係為佢嘅心願，好有紀念性，做演唱會好辛苦，頂籠開兩場好喇！」