昨日本報獨家披露羅文肝腫瘤的病況非比尋常後，昨日他終於親口承認肝臟有惡性腫瘤，即不幸患上肝癌！
之前羅文一直向外界聲稱肝臟腫瘤屬良性，沒有大礙，只因他不想旁人擔心，寧願對人歡笑背人愁。不過經本報揭露真相後，他也覺得病情已到不可再隱瞞的地步，昨日羅文接受查小欣的電話訪問，大方向外界交代患肝臟惡性腫瘤的情況，而在整個訪問中，羅記談笑風生，說話中氣十足。
羅：羅文查：查小欣
羅：我真係諗都諗唔到唔可以割，醫生話因為個瘤黐住個胃同膽，如果開刀會涉及好多嘢，開刀唔好，而家用藥物治療。
查：咁而家用收縮腫瘤嘅藥？
羅：同醫生研究緊。
查：咁個腫瘤有冇危險性呀？
羅：唔係嘅。良性係唔會發展，但惡性就會發展，惡性唔小心處理，就會感染到外面。
要小心打理
查：咁你係良性定惡性呀？
羅（表現大方，用好肯定的語氣說）：屬於惡性，要小心打理。
查：而家感覺點呀？
羅：冇呀，開咗三個窿，個傷口好痛，一開刀就要花最少一年半載時間去康復，唔開刀就唔會傷元氣，可以快啲唱番歌，唔開刀仲好。
查：你係咪搵緊中醫醫呀？
羅：冇所謂，睇邊個好咪睇邊個囉，其實肝病喺香港係大問題，肝弱無人注意到，係全世界嘅問題，每個人注意個肝係好重要，要照顧吓。
查：醫生有冇叫你戒口呀？
羅：冇，不過叫我唔好飲酒，其實我都唔係酒徒，喺朋友見面、食飯，飲少少紅酒，係慢慢嗒，唔係「隊」酒，都係尋開心啫，又唔係搵痛苦。
查：報紙《東方日報》話有記者知道你病情，擔心到喊喎？
羅：我都知佢哋（記者）對我好，我好感動，但佢哋誤會晒，以為無得開刀就冇得救，啲記者出嚟都係為做嘢啫，佢哋跟（追訪）咪同佢哋傾吓囉，傾吓又唔會死，藝人應該同記者關係好少少，跟嘢都係佢哋嘅工作啫……
多謝好多人
查：容祖兒佢帶魚翅嚟探你喎？
羅：無，不過佢好乖，一落機就嚟，佢喺美國買咗靚眼鏡俾我。我要多謝好多人，老闆楊受成好錫我，外面好多傳言我唔理，我係佢旗下歌手最花得多錢，同賺唔到錢嘅歌手，佢好用才，佢係生意人，但係遇到好嘅音樂都會推動，圓我多年夢，佢同我講下次又玩囉，我入英皇兩年來，佢對我最真心。
查：咁醫藥費係楊生俾呀？
羅：我唔會，朋友還朋友，佢嚟探我，我好感動，差啲喊，佢係老闆都嚟探我，有晚為咗擔心我瞓唔着，我為佢賣命都制。
查：醫生話你點呀？
羅：佢話無見過咁健康嘅病人，而家係有啲傷口囉。
做完訪問後，羅文一身名牌打扮，戴住黑超出發到中環看腫瘤科醫生，又和友人飲茶食飯，期間更同記者玩作一團，其樂觀面對困難的精神令人佩服，難怪羅文人緣特別好。昨日本報又收到不少讀者來電說要介紹醫生給羅文，希望他早日康復。
英皇仍會安排工作
英皇藝人管理部總監霍民希表示，公司一直沒有接到羅記通知他所患的是惡性腫瘤，但無論如何，公司都會支持他。
她並表示公司不會因他患有惡性腫瘤而減少他的工作，只是取消了他近期台灣之行及無線到加拿大的慈善騷，她解釋點解仍會繼續安排羅記工作：「羅記一出院仲講：『快啲出去做嘢咯，商量一下大計先』，他不嬲好鍾意工作，如果他想工作，我哋會繼續慢慢俾他工作，一切視乎羅記個人意願。」