羅文繼去年十二月中因屙嘔休克入院八日後，前日籮記又驗出肝臟腫瘤擴大，情況緊急，籮記決定下周三（五月二日）入院做切除手術及留院觀察，原定往台灣參加金曲獎表演以及所有宣傳活動都一一取消。
籮記雖然有病在身，但仍改不了愛「蒲」性格，不但不留在家中休息，相反一早出街行勻他至愛的中環區，行足九個鐘，可見籮記未有因為有病而影響心情。
晨早九點出發
昨日籮記晨早九時已經自跑馬地寓所出發，先前往醫院檢查，及到中醫處「把」脈，之後又到美容院做Facial、中環歎茶及逛名店，直至五點幾六點，籮記才在助手及三位好朋友的陪同下由司機接返家中。記者見籮記未落車時「挨」在車廂中休息，不過一見有記者上前拍照，籮記又回復精靈，大方的立即落車跟記者傾偈及拍照。
星期三做手術
一身名牌打扮，扮到鬼火咁靚的籮記一落車就同記者說：「醫生話一定要割（腫瘤），禮拜二晚就入醫院，禮拜三做手術，割瘤都係一個大手術。今次係專科醫生睇我，上次唔係，而家（個腫瘤）大咗，割咗咪一了百了囉！（你擔唔擔心呀？）唔使擔心，我都未玩夠，所以我今日去中環做Facial減壓，仲有睇中醫。你哋唔使嚟探我，醫院啲醫生唔俾探。」
籮記已有半年沒有去台灣，當他得知不能到台灣做宣傳大感失望，因為他好喜歡台灣的小食，籮記開刀後需要靜養，預計在五月底才會再到台灣。