得了個怪病的羅記，一夜間，腰圍竟然由三十吋變成三十六吋，「大肚」的原因，原來滿肚都積滿血。雖然聽來十分駭人，不過更駭人的是──痛得死去活來的羅記，當知道要入醫院要搭救護車時，竟然不理自己身穿孖煙囪，都要助手替他戴「黑超」。入院一星期後，羅記終於得醫生批准，今日讓他回家休養。與病魔大戰過一場，雙目無神的羅記說回當晚自己的行為，也不禁話自己「好娘」，然後再加一句：「明星係咁啦！」
今次羅記所得之病，是一個怪病，他已經記不起醫生所說的長長英文學名，只識得向記者笑道，『我叫呢個病呀！做另類惡爺病！！』原來此病是細菌感染入肝，令他肝臟長了很多小血瘤，當日他休克送院，是因為小血瘤爆烈，令身體流失七成血，瘀血並囤積在腹腔內，令羅記肚脹，腰圍更由３０吋變為３６吋，羅記休克不特止，並全身抽筋，假如他助手不是在他身邊，及時將手伸進他口內，讓他咬其手指頭，他已經可能咬斷自己的舌頭又或者中風身亡，故羅記不斷道：「阿東係我救命恩人。冇咗佢，我可能死咗，又可能中風，半身不遂囉！」
入院這星期，醫生不斷用針打藥進羅記體內，對抗那些血瘤，故兩邊手已經打到紅腫一遍，『好鬼痛呀！我最怕打針呀，今次真係報應，打針打到手冇力，早幾日連樽蓋都開唔到，我一世人成日講，叫我３６吋腰，我死咗佢好過呀，點知依家排咗啲血，但係仲有好多積住，要等佢自然流出體外，依家仲係３５吋腰呀！我最憎食粥，飲暖水，食足一個星期粥同飲暖水！』記者見這個貪靚鬼羅記，入院也一樽二樽化妝、護膚品帶齊放在牀頭，還有一個太陽眼鏡，認真搞笑，羅記笑道：『你哋唔好笑我呀！明星係咁啦，呢個係完全反影出藝人心態，我話你哋知，我好娘呀！我呢世人未曾坐過救護車入醫院呀嘛，個晚已經病到暈陀陀呀，只係聽到佢哋話要送我入院，我咩都唔識，連自己着住條『孖煙囪』都冇理，唔識話要着番條褲，但係就只係識大叫，比個太陽眼鏡我！比個太陽眼鏡我！』於是大名鼎鼎的羅文，就口罩氧氣筒，帶着個黑超，被醫護人員用擔架牀抬進院。救護人員不知是不是見他帶上黑超，以為他怕記者，竟然也搞笑問他，『羅生，你係咪怕狗仔隊影呀，依家到啦，駛唔駛同你行祕密通道呀！』弄得羅記也啼笑皆非，用盡最後一口氣說：『我依家好辛苦呀，理佢咩貓仔狗仔！唔理啦……。』
雖然連醫生也說，羅記最少要住上兩個星期才可以出院，可是他一個星期就已經打死病魔，連醫生都說神奇，羅記得意道，『我係一個意志力好堅強的人？我成日同自己講，呢個世界好美麗，我仲有好多嘢未玩，唔可以咁早死呀！所以我好勁，一定唔會輸比病魔！醫生話同我驗過血，啲血好乾淨，膽固純又正常，所以肯早放我回家，不過依舊要食藥兩個星期，仲要按時覆疹。』
羅記說英皇老闆楊受成來過看他，並向他說：『大難不死，必有後福！』並準備等他一出院，便為他開派對慶祝，令羅記雀躍萬分，『我好想快啲出去玩呀！喺到真係悶死我啦！』