星島日報支持新城電台與傑出青年協會合辦‘逆境自強’電台節目，並於周六優先於本報刊登節目精華內容。該節目由著名藝人譚詠麟主持，每星期訪問一位傑出青年，暢談他們面對逆境的心得。
‘逆境自強’逢星期日上午十時於新城９９７播出。
富家子突遇家庭巨變，富貴成空，由低層做起卻遭人白眼……以上橋段在電影、電視劇中不知上演過多少次。不過，在現實生活中，歌星羅文卻親身經歷過這種苦況，要突破逆境，羅文認為最重要是自力更生。
以下是羅文接受「逆境自強」主持人譚詠麟訪問的部分內容。
譚﹕呀﹗其實有樣野我想問，但咁多年都唔敢問，亦都唔好意思問。我聽到啲人講，話你未入娛樂圈之前，初初嚟到香港，喺匯豐銀行拉閘喎﹖
羅﹕我嚟左好耐，六二年嚟。唔係匯豐銀行。我覺得人生個變幻，我就好鍾意「家變」呢首歌，「變幻原是永恆」，我覺得人生有變幻，有變幻先至好玩。成日你紅晒有乜好玩啫，咁我細個屋企好有錢，突然間變囉，一個人嚟左香港，所以我要靠自己囉。人唔會死嫁﹗靠自己一定唔會死，由細做起囉。我嗰陣時第一份工作做乜呀﹖我記得喺間服裝鋪做學徒，擦校服。第二份工係喺荔園兒童樂園做，最收尾喺銀行做Ｂｏｙ。呢個時候，我先開始讀夜校讀英文，然後先至接觸到披頭四英文歌學組樂隊。
譚﹕其實你喺娛樂圈咁多年，你有無一啲環境、一啲時間你係覺得好低落嫁﹖
羅﹕都會有嫁。每個人都會有，唔係話在乎你張唱片賣唔賣得，而係你個感覺。
譚﹕你工作之後嗰種成就感，有時滿足唔到自己﹖
羅﹕都有，同埋有段日子你做啲野硬係棘手。
譚﹕咁係乜咩時間呢﹖
羅﹕我諗係我做完「柳毅傳書」有段日子，咁呢我就去台灣發展，因為嗰陣時唱片公司都會希望我地香港歌手去台灣發展。但返到香港，突然間覺得同香港樂壇有個隔膜有個生疏，即係太多時間擺係台灣。咁一返到香港，啲人話咁耐無見你嘅﹗又好似廣東歌又生疏左，咁你自然個心境係唔係同香港脫哂節呢﹖咁你係唔係又要重新適應過呢﹖
譚﹕你呢個時間點克服呢﹖
羅﹕我諗克服要靠自己，我到依家我都有個推論畀自己，呢個世界唔好靠人，要靠自己。
譚﹕命運操縱喺自己手裡面﹖
羅﹕唔係。命運係會有，但點你都要靠自己。譬如我同我啲學生講，我教左你唱歌，但一個禮拜先得一個鐘頭，得好少時間，其餘時間要靠自己。唔通你上台我擘住你個口，捉住你隻手上台咩﹖都要靠自己。
我覺得做人，就算順境唔順境都要靠自己。所以我個人，除左最近睇左白龍王，我好信佢之外，以前我好少睇呢啲野，唔會去批命呀﹗睇下今年流年。我覺得睇左又點呢，話你今年唔好，咁你就唔做野呀﹗話今年好，你坐喺度等咩﹖唔好畀個環境影響，就算你今年流年不利呀，你都要積極﹔或者呢段係你嘅進修期，儲蓄下先囉，到你運到嗰陣時，就做到樣出嚟。如果無儲蓄到，你就運到，咁你點承受個運﹖你擺乜野出嚟先﹖
譚﹕呢樣講得啱，依家香港人又話經濟低迷，又話嗰個逆境點樣點樣。你頭先番說話好，喺咁唔順利嘅時候，應該武裝自己，進修自己，將自己充實，等到機會到，就可以發揮，再運用自己嘅努力。
羅﹕我就覺得香港人呢幾年用左好多唔正規嘅手法，乜野都去炒。呢個炒字我覺得係香港最大問題，唔會去用心思想去為自己工作。譬如嗰陣時，炒乜炒物，啲人就賣晒啲樓，辭哂職去炒。咁你呢個變咪唔正確，整個香港變左無人做野，而係大家去炒野，咁變左整個社會嘅經濟係好浮誇，唔係喺個根基裡面。我覺得香港喺呢個逆境好應該反省一下自己，應該點樣重新將自己個基礎打好佢。人人自己打好啲，整個社會基礎就穩。