1999-01-04 天天日報 唱片賣得人氣好偏偏冇獎 羅文替伊麵抱不平

鄭伊健九八年嘅成績似乎唔錯，不過到頒樂壇成績表時，伊麵直到目前為止都係交白卷，新城電台的勁爆、商台的叱吒及港台昨日公布的十優歌手，全部冇伊健份，雖然當事人話唔介意，冇所謂，但有人睇唔過眼幫佢出頭。

呢個人就係佢師傅羅文，「籮記」愛徒心切，一聽記者問佢對頒獎禮有乜睇法時，即刻藐晒嘴好不屑咁話﹕「理得佢死呀﹗」

最初佢話唔想畀意見，之後又頂唔順要為愛徒出頭，指伊麵冇獎攞好唔合理，他說﹕「我真係唔明伊健唱片賣得、電影又賣座、人氣又好，點解冇獎呢﹖」

他指最大問題係本地樂壇頒獎禮嘅形象唔健康，三個電台同一個電視台，個個台嘅政策唔同，播歌方式各異，冇統一嘅評選標準，啲獎鍾意畀邊個就畀邊個。

他說﹕「既然標準咁含糊，作為歌手根本唔駛理咁多，唱片賣得最實際。」

他表示伊健唔會為冇獎而失望，因為已經習慣左，又唔係第一次冇獎攞，所以目前最重要是排好舞台劇。

前晚他本來約伊健睇舞台劇「梁祝」，但伊健臨時有事甩底，他今次捧蓋鳴暉場，因對方跟他學唱「梁祝」裡面的歌。