羅文說﹕香港的狗仔隊有乜咁巴閉，大驚小怪，香港啲記者咪起步遲，人地六十年代，伊莉莎伯泰萊同李察波頓結婚，啲記者日夜跟蹤。我地都係呢兩三年才開始。明星啲八卦野係人都鍾意睇。食得鹹魚抵得渴，你地成日話啲狗仔唔好，喂，世界點可以咁，你又要紅，又要人出街唔識你。不如唔好紅啦﹗
沒有精采的人生閱歷，斷斷說不出這樣平易近人的慧語。人生如戲，戲如人生，上台下台，努力做好自己，「數尺地五湖四海，幾更天萬古千秋」，將萬古千秋的漫長時間，濃縮在幾小時劇情裡，以有限的舞台展開無限的人生，不亦快哉﹗
一個人愈紅，拜盛名之累，佢啲八卦秔就愈多人想知道。張愛玲生前，由於深居簡出，一個超級張迷，竟然不惜千辛萬苦，搬去佢隔鄰左右，日日睇佢拋出嘅垃圾，從中了解，或者偷窺偶像的私隱，如此用心，可謂瘋狂。可見狗仔隊未算可怕，有些超級迷哥迷姐才真的可怕。
話說演員米高·福克斯，不斷收到一位女影迷的信，兩年中這名女子就寄出六千封信，使福克斯飽受騷擾，但這名女子的家人好不到那裡，因為她日夜不停的打字聲，逼得家人也快瘋了﹗又如一位迷戀麥當娜的羅拔哈斯金斯，此位大哥最愛闖入麥當娜的私宅，每次秘訪更不忘移動一些擺設，以示佢到此一遊，其後向麥當娜求婚被拒，竟揚言要殺人全家，咁瘋狂嘅行為只好換來坐監下場﹗
所以羅文話香港啲狗仔隊冇乜咁巴閉，係真嫁﹗是以自己紅時，遇到娛記要影張相交差，合作啲大家歡喜，毋須講咁多道理。