1996-04-03 《香港電視》 — 羅文與他的阿旺 (第1483期,第032頁)

見到羅文，問起佢隻阿旺。

阿旺係一隻狗，今年十一歲，六年前第一次見佢，就覺得佢係一隻蠱惑狗。

羅文話：「哦，阿旺呀，越來越識得呃飲呃食嘞。」

我隨口而出，笑笑口話：「物似主人型吖嘛。」

此語一出，羅文有少少嚇親咁款。其實，我係隨口噏，整蠱吓羅文。

識羅文成三十年，佢係一個工作最認真同嚴謹的人，無論佢係處於事業的高峰或低潮，佢嘅歌藝都係圈中最好之一，又點會係「呃飲呃食」之輩呢。

羅文每早起來，會先飲一杯水清吓腸胃，跟住飲咖啡，吃一塊麵包，喺羅文飲咖啡吃麵包的時候，阿旺就兩眼發直咁望住佢主人，佢哋話佢個表情就係「尚未吃早餐」嘅表情，羅文就問阿東：

「餵咗阿旺未？」

「餵咗嘞，佢吃咗兩塊麵包添呀。」

阿東一講完呢句，阿旺即刻行咗去。佢哋話：「吓，又想呃飲呃食？」佢一被識穿，知道冇行，即刻行咗去。

羅文家中廚房不常開火，偶然也會煲湯，阿旺一聞到豬骨味，整日都不捨得離開那煲湯，但籮記他們一買日本魚生來吃，佢就一派事不關己的樣子，這個阿旺，為羅文的生活帶來不少樂趣。