羅文病逝，Uncle Ray很惋惜，更使他記起三十幾年前剛認識羅文時一段鮮為人知的往事！「我六七年就認識羅文，當時佢啱啱從大陸嚟香港。佢個人好有禮貌，又勤力，進步好快，記得有一次佢同樂隊《Roman And The Four Steps》上嚟我嘅節目表演。當時佢唱咗首英文歌，之後就問我意見，我同佢講，佢英文咬字唔係好掂，最好同人合唱。」
Uncle Ray當時以長輩的角色向羅文建議，未想到羅文卻記在心上，還努力去改善，結果羅文不但英文咬字準確，中文發音也字正腔圓，結果成為他唱歌的演繹特色。「六年前，港台同我搞咗個生日Party，羅文特登走嚟同我講起呢
件事，仲即刻唱咗首《Smoke Gets in Your Eyes》畀我聽，睇見羅文咁認真，加上佢充滿誠意同埋感情嘅歌聲，我真係好感動！羅文真係一個人才！」Uncle Ray唏噓地說。
不過，當提到另一位已隱居的老朋友、素有歌神之稱的許冠傑，Uncle又鬼馬起來，「你知唔知呀！阿Sam退居幕後連人都唔想見。不過，佢會約我食飯嘅！但有時都幾麻煩，因為阿Sam鍾意食牛扒，又為咗少啲機會俾人撞到，所以約親都係五點鐘，唉！大佬呀，咁早點食扒呀，哈哈哈！」