羅文昨日出殯，過百位演藝界人士都有上山送羅文最後一程，之後大部分人都有去英皇駿景食解穢酒。劉培基透露應羅文家人要求，羅文的骨灰不會撒落獅子山下，只會留在家中安放。
劉培基離開時接受記者訪問，他透露上山時有兩大個箱子，原來裏面盛放著羅文生前的衣服，他說﹕「裏面係一啲羅文生前嘅衫，同黑白皮鞋、冷衫等，因為金屬同玻璃唔可以一齊燒，所以陪葬嘅都係一啲平時陪籮記瞓嘅用品。」
有傳羅文的骨灰會撒落獅子山下，羅文與香港人永存同在，但劉培基卻否認說﹕「籮記家人睇法係覺得人都走咗，要欣賞、愛戴佢應該係生前，唔係走咗之後，我哋亦尊重佢家人嘅想法，決定將骨灰留喺屋企供奉。」劉培基回憶與籮記點滴時亦眼濕濕﹕「工作上羅文係無與倫比，佢有時好惡，但又識買卡氹朋友開心。」
李美鳳隨時誦經
而與羅文的最佳拍檔甄妮表示，出席完羅文喪禮後，過兩日便會飛返美國，問到有冇瞻仰遺容﹖她說﹕「唔使啦，我哋咁熟，成日都見啦﹗」而李美鳳雖然沒有上山，但在離開靈堂時亦表現傷心﹕「我會隨時隨心為羅文誦經。」
昨日大部分人都表現得非常哀傷，唯陳百祥則較冷靜地說﹕「唔會太悲傷，做咗朋友嘅責任，遲早都同佢去埋嗰度。﹙覺唔覺得喪禮好多是是非非﹖﹚我睇唔到唔好嘅消息。」