日前有救護車出現羅文住所門口，原來有人虛報。昨日，羅記前助手兼好朋友Terry接受港台訪問，他激動指責造謠者居心何在。他說：「非常痛恨同譴責那些造謠者
，點解會發生這樣的事情，這些人的居心，傳媒的操守亦係一個問題，傳媒係想做新聞，由羅記有事到現在，我們一直無回應過，報紙平面嘢都由得他們寫，今次又有虛報救護車，報紙雜誌係咪要佢走了先開心？咁先完成Job？真係懷疑係記者虛報。過去兩三個月來，我們對平面報道好失望，寫咗係咪好開心？每日有成六、七十個記者在樓下等，初初都好諒解，他們都係為生存而打工。但係尋日虛報事件後，同管理處了解，都有懷疑係傳媒打電話。」
他又稱，「羅文唔知呢件事，我哋唔係封鎖佢嘅消息，只係畀積極正面嘅消息佢，唔需要畀負面新聞佢知。今日係忍唔住要講番啲嘢，看完報紙登十字車，唔係登來做咩？依家日日都有四、五架車喺度等，可能忍唔住要搞些新聞，呢兩、三個月來已經傳咩傳咩，我要極力譴責呢啲係不負責任的行為，打電話的人係人渣，有無必要要咁做呀？騷擾埋鄰居，羅文有事之後日日有車跟，好彩鄰居都好明白，好合作，亦都無騷擾到羅文。不過，呢幾日都盡量勸喻羅文的好友有心就唔好來。」
Terry又好多謝外間及市民對羅文的關心，不少熱心人士都有贈藥及鼓勵羅文，Terry更透過空氣高呼：「依家羅文食得瞓得，精神好，少食多餐！但對於傳媒質素下跌就覺得好失望！」