羅文近月深居簡出休養生息，由於久無露面的緣故，曾經有揣測指羅文肝癌惡化，近日羅文頻頻相約朋友行街食飯，病情惡化之說不攻自破。昨日羅文再次出動，與已故大導演張徹的太太及助手一行人，於中午時分到銅鑼灣某飯店進餐，羅文沿途一直用手巾遮面，似有意不讓消瘦的容顏再次曝光，對於記者的提問一概不回應。
心情輕鬆食點心
不過見羅文進餐時與朋友一邊食點心一邊傾談，心情輕鬆，期間發現有記者在飯店門外拍攝時，他即童心大發用手巾包裹面部，以蒙面人姿態讓記者拍照，飽餐一頓之後便返回家中繼續休養。
相隔不久見到羅文的座駕載着一位神秘男子回住所，司機更拿着數袋類似中藥的物體隨後入內。
暫唔適合打麻雀
旁晚劉嘉玲亦在羅文住所出現，起初還以為嘉玲是來與羅文打麻雀消磨時間，但羅文助手阿東證實原來是一場誤會，他說：「劉嘉玲係去探隔籬嘅朋友，不過佢都有過嚟探羅文，羅文精神好好，但暫時都唔適合打麻雀；啱啱食完飯的羅文都想去散步，不過咁多記者跟住，羅文為免混亂最後決定返屋企，唔好再喺屋企樓下等啦！你哋咁樣會害咗佢，搞到佢連散步都唔敢去，嗰位神秘男子其實係醫生，而家羅文用中藥調理身體為主，食得瞓得精神好好。」
城城祝肥肥白白
沈殿霞昨日出席《麗花皇宮２００３》宣傳活動時表示：「我朝早先同羅文通完電話，羅文把聲前所未有咁好，中氣十足『轟』、『轟』聲，身形瘦係應該，我家姐細佬都有過癌症，做完化療個人成日想嘔係唔吸收，希望傳媒唔好報道咁多負面新聞，俾多啲鼓勵同埋支持佢。」黃霑在同一場合亦表示：「癌症唔一定死，心境開朗就會好快好番。」
郭富城對羅記的瘦樣仍懵然不知，他謂：「我冇睇到報紙。覺得大家都關心羅記，佢係樂壇嘅百科書、分量高，其實佢嘅健康，大家都關心，我衷心祝福佢，身體快啲冇事、肥肥白白，費事歌迷心痛。」