羅文一直奮勇對抗癌魔，但最近卻不斷傳出他病危的消息。羅記昨日終難忍謠言頻起，遂接受查小欣「茶煲裏的查篤撐」的電話訪問。在電話中，羅記中氣十足，且喋喋不休，還風騷地說自己躺在床上接受訪問，並傾到不願收線。
羅記表示現時情況十分良好，走得、食得、瞓得，只是因為早前接受過一次化療，令到身體瘦了，他自覺唔靚仔，故刻意迴避記者拍照，他勞氣地說：「最近我嘅助手阿東同前助手Terry三番四次喺半夜三更接到記者電話，話我病危，深夜接到呢啲電話，好得人驚吖嘛！唔知傳媒居心究竟係點，係咪想咒我啫？我好反感，等我肥番啲，咪俾大家影番囉，依家真係唔靚仔，又瘦。」
再度接受化療
羅記表示上次到醫院，接受了一次局部性化療，醫生在他的肝注射藥物，肝臟吸收藥物後，令腫瘤腐爛枯死。
另外羅文因為腹腔積水，醫生為他抽了二千毫升的水，他說：「做完化療頭一、兩日，唔想食嘢，少少發燒，而且會瘦，遲啲要再做第二次化療，第一次醫生唔敢注射咁多藥。醫生話好有效，癌細胞已經死咗少少，仲話我臉色紅粉緋緋。」
羅記又說每朝都好想起身晨運，夜晚食完飯，到山頂漫步，不想終日躺在床上，但可惜屋企樓下廿四小時都有狗仔隊守候，搞到他只好躲在家中，他一輪嘴說：「有時我都會叫助手睇吓樓下有冇記者，然後偷走出去，我要多啲運動先至長肉，我要長十五磅肉，成日躲喺屋企，好似廢人咁。」
只係諗食好嘢
當查小欣問他可有立定遺囑時，他即提高聲線說：「冇！呸過你，我啲首飾咁靚，未戴夠，仲乜要分俾人喎！唔可以當自己有病，要話俾自己聽『冇病』，成日放喺口邊『死嘞，死嘞』，咁就真係會死。我每日乜都唔諗，只係諗有乜好食，今晚食乜嘢，阿東依家又去咗買餸咯，幾開心，所以我話俾大家知，我冇事，一定好番。」