羅文患上肝癌後，一直都勇於對抗病魔。直至上周五，羅記突然入瑪麗醫院接受手術，結果手術十分成功，經過約一周靜養後，羅記終於昨日秘密出院返家。
一向貪靚的羅記，由於不想其手術後的病容曝光，加上怕在醫院守候的記者因他出現而引起混亂，故設法秘密出院。昨日羅記成功避過記者網離開瑪麗，不過問到羅記的出院時間，羅記的前助手Terry及現任助手阿東就有兩個不同的說法。
昨午醫院傳出羅記出院的消息，Terry表示：「係呀，羅記已經出院，大約係十二點，佢出院後，仲去咗飲茶，行吓大運添！（係咪經秘密通道走呀？）梗係唔講得俾你哋聽啦，總之羅記出咗院啦！」
回家第一時間上香
不過羅記助手阿東卻提供了另一版本，他說：「羅記出咗院啦，佢係半夜點幾兩點出院，其實呢幾日我都特別留意記者行蹤，我見啲記者走晒，羅記咪出院囉！（醫院俾羅記咁夜出院咩？）醫院方面可以傾嘅啫！羅記喺我同Terry陪同下出院，羅記精神好好，唔使扶，自己行，我哋喺正門走，唔使行特別通道。羅記返屋企後第一件事梗係上香啦！瞓醒睇報紙，睇吓有冇大事囉，不過暫時都唔會見記者住，遲啲先啦！」羅記返家後，阿東就忙於出街買餸。
據現場人士透露，羅記出院時身穿Prada米色恤衫，Burberry格仔褲，架上膠框眼鏡離開，而羅記的精神尚算不錯。