抗癌鬥士羅文日前秘密入住瑪麗醫院，情況不明，昨日消息傳出後令樂壇震驚，大批傳媒，羅文契媽及他的助手等，都趕到醫院了解，大家都擔心羅記是肝癌惡化，不過，羅記助手阿東和前助手Terry卻異口同聲謂羅記只是腸胃炎，休息兩、三日便可出院，然而，據院方消息人士透露，今次羅記入院情況並不樂觀，病因是操勞過度令其中一粒腫瘤爆裂，導致腹腔積血，情況令人憂心！
據知，羅記最近為了九月十三及十四日在紅館舉行的兩場演唱會狂操器械，希望以最佳狀態演出，點知物極必反，羅記因操勞過度令其中一粒腫瘤爆裂，導致肚內積血，終在上周三感到嚴重不適要即時入院，而最令人憂慮的是，羅記入院不足一星期，體重已急降十磅，整個人也變得憔悴！
今次羅記病情告急，令身邊人十分擔心，九月演唱會能否如期舉行，都要視羅記病情進展而定，但據知英皇為了激勵羅記，決定為他保留個唱檔期，作為一種祝福，希望羅記和病魔惡鬥期間有個寄託，能憑意志力戰勝病魔，早日出院完成他開個唱的心願。據知，演唱會本訂於今年年初舉行，但因羅記肝癌一直未有進展，故羅記決定將個唱押後到九月，想不到羅記突然入院，演唱會能否如期舉行仍是未知之數。
陳伯唔講病情
昨日記者一早到醫院守候，羅記的助手阿東和前助手Terry輪流在病房陪他，初時兩人對羅記病情各有說法，一個話羅記有咳入院，一個話羅記只是例行入院檢查，至昨午兩人才「夾好口供」，異口同聲指羅記患上腸胃炎。究竟羅記做過甚麼檢查？阿東卻咿咿哦哦話抽血之類，對於有指羅記病情有變，阿東就直斥：「啋！梗係唔係啦，佢冇事呀！」阿東指羅記入院全因「為食」惹禍，他說：「前幾日我同羅記食魚生，可能啲食物唔乾淨，我即刻肚屙
，羅記抵抗力好過我，過幾日先見個肚唔舒服，大前晚佢話肚谷谷，咁安全計咪送佢入院囉，醫生話只係腸胃病，冇乜事，唔係嗰啲嘢（癌病復發），大前晚吊咗葡萄糖水後，依家不知幾精神，把聲幾大，我要返屋企攞中藥俾佢飲，陳伯都知羅記入咗院。」記者致電陳伯時，他說：「唔怕，佢冇乜事。（你有冇鬧羅記唔戒口呀？）哈哈。（咁羅記病情點呀？）呢個唔可以講，唔好意思。」
英皇高層探望
而昨晚約七時，英皇行政總裁吳雨聯同三大高層鄭堯強、霍紋希和甘菁菁到醫院探羅記，逗留不足十分鐘就離開，吳雨表示：「冇乜嘢，羅記好精神，佢食錯嘢搞到腸胃炎啫，check過晒冇乜大礙，羅記仲託我多謝大家關心（楊生有冇嚟探羅記呀？）啱啱打電話問候，楊生都多謝大家有心。（傳羅記病情有變喎？）冇乜嘢，我特登同大
家交代一聲，病人都唔想睇到咁唔開心嘅新聞，希望大家唔好誤會，真係冇嘢。（咁演唱會會唔會照做？）同羅記傾過吓，不過都唔使傾，一切如常，演唱會照開，大家放心。」