2002-02-09 東方日報 羅文靚裝出席壽宴百人到賀

羅文於年三十生日，英皇老闆楊受成昨晚於中環麗嘉酒店設宴為他預祝。晚上約八時半，羅文和契媽乘坐勞斯萊斯到場，一向愛靚的羅文，自然悉心裝扮，以黑色西裝配鮮豔紅絲巾，再襯上碎鑽太陽眼鏡及襟針，珠光寶氣搶眼非常。

羅文落車後，在場記者即祝他生日快樂，羅文笑容滿臉，談到生日願望時，更中氣十足表示要身體健康。羅文各方好友包括楊受成夫婦、陳寶珠、鄺美雲、陳冠希父親陳澤民、袁詠儀、張智霖、車婉婉、草蜢、江欣燕等均有到賀，當相士陳伯和黎姿結伴而來時，羅文更親自出來迎接。

羅文表示：「全身嘅打扮都係人哋送，由恤衫到外套，由頭到腳，由內至外都係學生同朋友送嘅禮物！楊生嗰份未收到，而祖兒就喺外地，我反而希望佢把聲快啲好番。今晚請咗成百位朋友嚟，佢哋嚟我已經好開心。」

由於嘉賓表示只要羅文開聲，他們做甚麼也可以，羅文笑謂：「咁唔通要佢哋除衫咩，佢哋個個着到好靚，真係好開心。」至於賀禮方面，陳寶珠送上現金大利是，鄺美雲送金飾，蘇志威送紅酒，江欣燕送枱燈，而蔡一智就送數碼相機。