羅文自於半年前發現患上肝癌後，一直深居簡出專心養病，甚至連老友甄妮邀他任個唱嘉賓亦推辭，但前晚其愛徒容祖兒在紅館舉行尾場演唱會期間，羅文卻忽然現身台上任嘉賓，獻唱一曲《前程錦繡》，頓令祖兒驚喜得淚如泉湧！
容祖兒一連三晚假紅館舉行的「H2O+容祖兒隆重登場演唱會」，已於前晚正式落幕，首次舉行個唱的祖兒，在尾場個唱上不禁感觸得四度落淚，特別是當師傅羅文攜着鮮花突然現身舞台。在羅文患上肝癌後首次開腔唱出一段《前程錦繡》時，祖兒更變成大喊包，驚喜得淚如泉湧！
籮記（羅文）在祖兒個唱中途突然殺出，祖兒即目瞪口呆說：「你又話唔嚟嘅？」籮記便笑說：「我冇話唔嚟呀，我病咁耐第一次開腔唱歌，畀個驚喜你，等你完咗演唱會，過兩日搞個小型慶功宴，我留番啲魚骨畀你，知你鍾意食。」
祖兒這時已忍不住哭着說：「我知道，你真係好錫我！」到籮記演唱半首《前程錦繡》後，全場一萬二千名觀眾即拍掌，掌聲如雷，而祖兒與籮記緊緊擁抱，氣氛十分溫馨感人。
「身體ＯＫ就唱」
事後籮記說：「祖兒真係唔知我嚟，我係特登畀驚喜佢，本來我重想一上台就見唔到人，即刻唱歌，但驚接唔到聲，所以我上台後至唱歌。我呢次唱咗一段《前程錦繡》，之前冇練過，我見身體ＯＫ就唱。」
早前籮記推掉了任老友甄妮個唱嘉賓的演出，這次他卻畀面力撐愛徒，籮記會否擔心甄妮生他的氣，他說：「唔知甄妮會唔會嬲我呢？但佢開演唱會嗰幾日，我放緊毒，腳都軟晒，我諗佢會明白嘅。」
「我最錫係祖兒」
稍後籮記的同門師弟陳奕迅的個唱亦快將開鑼，問籮記會否再次出任嘉賓，籮記說：「梗係唔會啦，佢又唔係我學生，冇法啦，我最錫係佢（祖兒）。」籮記並稱近日他每朝都會到馬會散步，下月他更可能往外地散心。