成立於一九八一年的「華星」唱片公司，曾於八十年代叱咤樂壇，不少當時得令的歌手都是出身自「華星」，最為人所熟悉的當然是「樂壇大姐大」梅艷芳、張國榮、羅文、呂方、鄭秀文、許志安、張衞健、陳奕迅、楊千嬅等，就連天王級劉德華和郭富城，他們的「處男碟」都是出自「華星」。昨日傳出停業消息，令不少圈中人大感驚訝和欷歔。
身為「華星」第一代歌手的羅文，坦言聽到華星傳出停業的消息顯得十分難過，感嘆連歌星都要失業。羅記憂心地向記者說：「真係令人好愕然，我都曾經係『華星』嘅人，當年『華星』叱咤樂壇，一時無兩，仲有阿梅、呂方呀，好威，個個嘅歌功都好勁，唱到街知巷聞。」
華仔：貢獻良多
羅記慢慢地沉醉在回憶裏，細數當年的威水史：「我嘅《浪淘沙》、《幾許風雨》、《波絲貓》、《柳毅傳書》，首首都好經典，好紅！『華星』仲為我落重本，我第一張唱片喺日本灌錄，仲係『華星』第一個歌手去外國錄歌。所以話，『華星』對我真係好重要。」
羅記不勝欷歔自問自答：「點解會搞成依家咁呢？可能冇乜歌手啦！一日都係啲翻版衰，搞到唱片業咁樣，害死『華星』，連歌手都失業。」
呂方贏得第二屆「新秀」冠軍後，亦與「華星」合作了七年，他無奈地面對「她」停業的消息。呂方說：「好慘，佢係我嘅母校，佢係唱片界嘅『老字號』。真係好可惜，希望將來可以重振聲威。」
劉德華的「處男唱片」《祇知道此刻愛你》就是「華星」的出品，身在大連作巡迴演唱的華仔聽到「華星」停業傳聞十分驚訝，他感慨說：「『華星』捧出咁多歌手為樂壇貢獻良多，經歷過好多風風雨雨，如今因為經濟不景氣搞成咁，真係令人欷歔。」
阿梅：深感不安
另一位天王郭富城的成名作《對你愛不完》與《沒有你的愛》亦是出於「華星」，他不敢相信「華星」停業，向記者一問再問，他說：「唔係吖嘛，真唔真，我真係唔敢相信。雖然我唔知現在可以做啲乜，但係好衷心咁希望世界同經濟都可以好轉，人人都安頓下來。」
至於華星大家姐阿梅透過助手向記者表示，聽到此消息後十分不安，但因暫時未清楚事情的來龍去脈，所以不會作任何回應。
楊千嬅：年尾流流好慘
楊千嬅去年約滿華星後，今年正式宣布加盟新藝寶，千嬅離開華星前的最後一張大碟《Kiss Me Soft.Play It Loud》，碟內的一首《少女的祈禱》唱到街知巷聞，大碟衝破雙白金銷量，令其歌唱事業創上高峰，昨日千嬅獲悉舊公司的慘況，她話：「今朝我接到呢個消息，好唔開心。話晒我喺華星大，聽到呢個消息呆咗，點會開心？我戥班舊同事慘，好唔開心，世界變成咁，經濟唔好，行政上唔應該咁，應該有個Plan，早啲通知啲打工仔，等佢哋有個寬限期，唔使一下子咁，話晒年尾流流真係好慘。」
曾是華星合約歌手的何超儀：知道之後我覺得好可惜，因為話晒呢間公司係間好公司，對音樂好有熱誠，啲幕後製作人真係好有心做音樂，依家搞成咁都好遺憾。
古天樂：等我了解吓先
昨晚剛剛由日本返港的古天樂，對於華星停業一事，顯得一頭霧水，他表示：「我乜都唔知，唱片公司都無通知我，你哋仲清楚過我啦，等我了解吓件事先！」
李彩樺：我今朝聽到都好突然，依家經濟咁差，真係冇辦法。
梁詠琪：太突然嘞，我同古天樂比較熟，都擔心佢嘅去向。
車婉婉：「吓！唔知道喎。因為我去咗冰島拍戲，啱啱先落機返嚟香港，乜華星停業咩，係咪真？我會打電話去問候吓梁漢文，不過，我估佢而家應該都會好煩。當年係華星冇俾嘢我做先至走，我離開咗華星已經六年，但聽到咁嘅消息都覺得好感觸，始終我都係出身華星嘛。」