年僅二十一歲、事業又如日方中的容祖兒，前晚因涉嫌牽涉入梁思浩案中，突被警方拘捕並准以二千元保釋，事件立即轟動全個娛樂圈。雖然容祖兒不免受輿論困擾，但她自問無愧，事件發生後一直大方面對，一切工作如常。至於其所屬的英皇上下及所有歌手，甚至連H2O老闆、歌迷皆挺身力撐祖兒。不過部分其他唱片公司的歌手立即劃清界線，頻說只是同祖兒屬Say Hi之交而已。
正在安心養病的羅文，亦致電本報為徒弟祖兒抱不平，他說：「佢只不過廿歲女，點會咁做呀？佢心地好好，又乖，佢最壞嘅朋友就係我。佢知我每日都會睇報紙，今朝一早已經打電話俾我，叫我唔使擔心，唔使驚，佢驚我影響病情，我同佢講老師一啲都唔擔心，做乜要驚。平時見佢玩啲遊戲都係拋吓波仔細路仔遊戲，扮吓佢就打人，哼，講笑咩！我俾人扮咗咁多年，咁我又打咗人九年囉喎？好唔通吖嘛！整蠱祖兒嗰啲人真係好唔啱。」
英皇娛樂藝人管理部總監霍紋希對此表示：「祖兒係無辜嘅，我哋對警方今次倉卒行動表示震驚，對佢唔公平。祖兒堂堂正正，乜都唔使怕！佢所有工作都會如常進行，心情亦冇受影響。」她同時亦呼籲大家冷靜處理此事，不要太過衝動，因在混亂間，祖兒與她都受傷。
陳冠希擔心祖兒
剛剛由日本返港落機的謝霆鋒，亦力撐同門師妹，他說：「我同祖兒拍過戲、寫過歌又監製過歌，佢只係一個廿歲嘅女仔，唔需要咁樣，我絕對相信佢係無辜，我唔希望有人搵藝人殺一儆百，好相信純粹誤會，警方都准佢保釋外出，即係冇事啦！（假如警方搵你協助調查呢？）我唔會理，冇咁多時間理咁多，唔關我事，亦冇料俾警方，我只可以同警方講依家拍緊《2002》同做緊唱片……佢哋鍾意咪寫呢啲料囉！」
陳冠希則被此消息嚇得碌大雙眼，驚愕地說：「吓？唔係嘛？未睇報紙呀！為咗乜事呀？邊個係梁思浩？我唔知發生乜事，好耐冇同祖兒傾偈。祖兒出事我都好擔心，佢係我朋友，我唔信有人打交關我公司事，我識我公司嘅人都好正義，我相信祖兒同呢件事冇關，會不會協助調查？警方一定唔會搵我，因為我係成家班，係成龍嘅人。」
雖然有傳何嘉莉在工作上與容祖兒競爭劇烈，但在今次事件上嘉莉亦全力支持祖兒：「佢一定冇事，我一定支持佢，叫佢唔使擔心。」而陳奕迅雖感驚訝，但他表示百分百相信祖兒是無辜的。同樣張家輝說不相信祖兒與事件有關。