2001-06-20 東方日報 羅文肝癌細胞受控制度過危險期

羅文昨日親口證實，經過「陳伯」細心治療，他已逃出「鬼門關」，體內肝癌細胞經已受到控制。記者昨日致電恭喜羅記時，他中氣十足，說話聲音響亮。還笑言自己愈來愈靚仔，簡直靚爆家中所有鏡子。

即將工作

記者問羅記是否已完全康復，他笑說：「你估傷風感冒咩，呢個係癌症。不過我已經度過咗『危險期』，依家係『穩定期』。一個月內有咁好成績實在好難得，一般人都要一年半載。我每天做運動，依家仲肥咗，反而我嘅中醫就瘦咗。」

羅記回想半個月前病情還是十分嚴重，連走路亦感到肝部極之痛楚。現在步履如飛，除了保持心境愉快，還要每隔一天煲不同的藥醫治和補身，以及朋友致送的靈芝、天山雪蓮和雲芝，所以癌細胞才迅速軟化。羅記還透露為了兩位即將出碟的男新人，他很快又投入教唱歌的工作。

十分有緣

昨日早上，羅記亦接受了電台訪問，他表示與「陳伯」十分有緣分，雖然很多人都想找他醫病，但他一一拒絕。羅記說：「『陳伯』已經很老，體力唔可以支持繼續行醫。而且佢唔係任何病都醫，為人極之低調，所以希望傳媒唔好訪問佢，騷擾佢老人家，到時佢嬲我唔肯醫我，咪死！」他又稱雖然癌細胞已受控制，但藥還是「有排食」，不可掉以輕心。