羅文前晚帶病亮相《萬眾同心公益金》時精神甚佳﹐並獲劉鑾雄捐出一百萬善款支持。原來劉鑾雄是籮記的歌迷﹐他致電余錦基說好鍾意聽籮記的歌﹐覺得籮記是難得藝人。不過﹐前晚余錦基卻險些說錯話﹐對著籮記說﹕「希望你用淨番……好多好多日子支持公益金﹗」余主席說時窒一窒﹐身旁的肥姐都拍一拍他的頭。事後余錦基亦承認衝口而出講錯說話﹐他說﹕「見到籮記難得咁辛苦都出嚟幫手呼籲﹐我開心得滯﹐希望籮記唔好介意﹐希望有奇迹出現﹐籮記突然好番。」
傳播樂觀信息
籮記昨日接受電話訪問時說﹕「今日醫生通知我再做超聲波驗肝﹐Check過無惡化。噚晚我亮相公益金好多人都話我靚﹐另外我好多謝劉生﹐好感動﹐一路都唔知佢係我嘅歌迷。﹙會否承諾好番唱首歌畀劉生聽﹖﹚你估賣唱咩﹗今次亮相係好好推動﹐將病人要樂觀對待病情﹐用意志力戰勝病魔信息傳出。﹙余錦基講錯嘢介唔介意﹖﹚無所謂﹐佢個心又唔係咒我﹐只係想支持我﹐我諗無乜人想咒我﹗」
澄清開個唱流言
另外﹐籮記再次強調無想過這段時間開演唱會。他說﹕「你估患感冒呀﹗肝癌點唱到﹖寫嗰個人都唔負責任﹐幼稚﹗目前我最重要同癌病搏鬥﹐感覺上天係借我樂觀、鬥志同精神負責將信息傳開﹐令病人更有鬥志。﹙陳儀馨想介紹醫生給你﹖﹚我好多謝佢﹐好多朋友都介紹好多名醫﹐但現在睇嘅中醫進展很好﹐對方八十多歲﹐每次睇症都花五、六個鐘﹐所以大家唔好騷擾佢﹐如果醫師無精力醫我點算﹗」