羅文入行三十年，就靚足三十年，即使最近證實身患惡疾，他亦一樣以靚樣示人，絕不會因有病在身，讓自己看來憔悴，認識羅文二十多年的時裝設計師鄧達智說：「男藝人中貪靚得嚟又夠膽咁妖豔嘅，真係只得羅文一個。」
五十一歲的羅文，雖然證實患上肝癌，但他仍樂觀地勇敢面對，還依舊每日扮得靚靚地出外會友，甚至去髮型屋理髮。七二年與肥肥沈殿霞組成「情侶合唱團」一舉成名後，羅文二十九年來不但在舞台上形象出位，靚絕舞台，就連在台下的他亦打扮得絕對一絲不苟，可謂靚足三十年。
羅文早前曾在訪問中自言：「我喜歡着皮草、戴珠寶……我係貪靚呀，重諗過教人點扮靚。」
羅文自覺有型
羅文自覺有型，他表示自己不算靚仔，但樣子也絕對不醜，他不介意隨着年紀漸長面上出現皺紋，因為皺紋代表人生經驗，不過如果面皮鬆了，有需要的話他會考慮拉面皮。
對於男人護膚，羅文亦有一套心得，兼且經濟實惠，他每朝起牀飲兩杯凍水，食兩粒鯊魚丸，另外每日食橙同梨，食橙更一定連渣食，有助清腸胃、排毒素。
鄧達智感佩服
香港時裝設計師鄧達智，與羅文認識二十多年，他佩服羅文夠膽妖，兼且妖到盡。
鄧達智日前接受本報訪問時說：「對羅文低胸、透視裝嘅舞台打扮，重有佢嗰啲閃令令同埋羽毛衫，我至今印象難忘。
「不過我最佩服嘅係羅文有除低假髮嘅勇氣，佢本來一直戴假髮，五、六年前發現自己甩頭髮，決定接受現實，唔再戴假髮，改為剪陸軍裝，對羅文嚟講係一個大突破，只有心胸廣闊嘅人至會咁做。
對自己要求高
「佢對自己外表要求高，對自己嘅工作表現要求一樣高，呢樣嘢至係最值得人欣賞嘅，男藝人中貪靚得嚟又夠膽咁妖豔嘅，真係只得羅文一個。」
籮記好友留言板
羅文一眾圈中老友，均佩服他面對惡疾的頑強鬥志，他們都願意伸出援手，鼓勵羅文繼續靚、繼續姣、繼續精采地活下去，戰勝病魔。
識羅文幾十年，佢直情係我哋嘅典範嚟！老兄，畀心機呀！
黃霑
我七二年同籮記組「情侶合唱團」嗰陣，佢已經咁貪靚嘅啦。佢真係幾時都咁貪靚，做藝人係應該貪靚嘅，藝人都唔靚，搵鬼睇你咩！籮記，記得繼續靚落去呀！
沈殿霞
識羅文咁耐，佢都係咁貪靚嘅啦，貪靚好吖，靚嘅人一定熱愛生命，我都好貪靚，祝籮記繼續貪靚落去，四哥永遠支持你！
謝賢
貪靚冇唔妥，重可以令到一個人更有生命力，羅文就係一個好有生命力嘅人，貪靚直情係佢嘅性格。
鄧光榮
我希望佢大步檻過，樂觀面對，咁樣會對病情有幫助。
靜婷