沈殿霞跟羅文分屬死黨，昨晚返電視城拍攝新劇《郵購新娘》，她一返抵化妝間，見到有記者等候，除了表明不想影相外，還主動開口說：「傾偈就可以，問羅記嘅嘢就唔講，佢嘅嘢應該問番佢本人，你哋做記者嘅應該鼓勵吓佢。」
徒弟何嘉莉很愕然：「吓？佢認咗？其實師傅（羅文）一直冇講個腫瘤係良性定惡性，醫生俾佢出院，一定問題不大，（哀求）大家最好唔好再提咁多，好難得師傅咁樂觀，我信他一定會大步檻過。」
容祖兒眼腫
徒弟容祖兒前晚為商台的「敢作敢樂森美小儀歌劇團」之《很長的Good Morning Miss》綵排，見她少有的眼腫腫並要一直戴黑超，又沒有心機，有指她為擔心師傅病情而哭過，才搞到眼腫腫，但祖兒否認說：「冇呀，我冇喊，一早落機吖嘛，立即排舞，又要嚟綵排舞台劇，有啲攰之嘛。」
黎明：「我已經打咗電話問候羅記，佢咁開朗，一定可以面對一切，羅記一定可以處理到，應付到。」
謝霆鋒難以置信道：「羅文患惡性瘤？我唔知喎！吓？佢入咗醫院咩？我都唔知喎，我淨係知佢唔舒服，呢排搞緊唱片，冇人同我講喎，我冇諗過咁大件事，佢一向仲龍精虎猛過我，如果佢嚟睇我音樂會，一定會唱首《小李飛刀》佢聽。」
葉佩雯慰問
一班英皇歌星張家輝、葉佩雯與陳冠希等，昨晚於電視城錄影「勁歌金曲」，對於羅文患病一事，全部都表現得好愕然，張家輝說：「吓，係咩，個肝有事都唔一定係Ｃａｎｃｅｒ，可能只係個肝弱啲，（羅文都承認咗！）有Cancer都可以割嘅，希望大家唔好從壞嗰方面去睇。」
葉佩雯：「吓，唔係啩，今日睇報紙佢都話係良性，我會打電話去慰問吓佢，始終佢都係我老師，但都唔知講啲乜嘢好。」
蔡一智難過
摯友蔡一智聞訊顯得難過，他不能相信且有點哽咽地說：「惡性？咪即係Cancer？證實未？佢驗清楚未？（自責）翌日我仲要去新加坡做嘢，好擔心佢，（再自責）我衰，呢排好忙，冇時間打電話俾佢，聽到好唔開心呀！我即刻打電話俾佢！」