由寰宇希望及香港房屋委員會攜手合辦的《長者希望日２００１》於昨日舉行開幕典禮，逾二千五百名熱心義工暫時放下自己家居的需要，付出時間和勞動力去幫助獨居的長者，為他們的居所清潔與髹漆，羅文聯同一班演藝界藝人，計有姚樂怡、麥家琪等到場打氣之餘，更身體力行，即時戴上手套，攞起漆油與掃，擒高擒低髹漆。髹到滿頭大汗都沒半句怨言。
羅記說：「我唔係第一次做義工去髹油啦，我退咗休之後就開始做義工，都做咗兩、三年，無記者嚟影相咪無人知囉。」（辛唔辛苦呀？）唔辛苦，我係熟手工人，睇吓油得幾靚。嚟得就預咗（污糟），你估我係大小姐咩？）
原來姚樂怡都是熟手工人，她說：「我以前搬新屋，都係自己落手落腳去油間屋！油油真係好辛苦，搞得幾日，手都軟埋。都搵咗三個朋友幫手，但唔可以完全依賴朋友，自己都要郁手。」
相對之下，麥家琪就真的有點雞手鴨腳，原來這是她首次髹油。農曆年將至，可會為自己屋企粉飾一番？家琪一聽到即大叫：「唔好啦啩，新年我會同班滑水朋友去潛水，唔喺香港過年。」
羅兆輝入院，她沒有去探望，現在羅已出院，會不會去探吓對方？她說：「遙遠祝福已經夠，我喺朋友口中得知佢已經無事。（驚唔驚畀人話妳無人情味？）內心祝福咪夠囉！。」
減肥減到面尖尖的家琪，三月會拍個豐胸廣告，可擔心再減下去，個胸縮到拍不到豐胸廣告？望一望自己個胸部，一臉自豪地說：「仲好大。」
她的身材又真係好突出，連前晚Star East的周年晚宴上，玩收賣佬遊戲時，司儀叫代表藝員組的阿倫搵個全場最大胸的女藝人上台，阿倫都揀她。不過唔知點解，家琪上台時，另一個女藝人張慧儀也同時出現在台上，她真識說話，說：「慧儀身材都好勁啫。」