鄭伊健早前出席加盟英皇記者會，老闆楊受成借出二百萬鑽石鏈為伊健造勢，用完即還！而身為英皇前輩級歌手的羅文，待遇卻非同凡響。前晚他一身珠光寶氣出席老闆為他而設的晚宴，慶祝他最新大碟面世，席間楊生更贈送一隻百二萬鑽表予籮記，實在「同公司唔同命」！
英皇老闆楊受成一向疼錫旗下的歌手，雖然羅文只是推出新碟，但楊生前晚特別為他在「Shanghai Shanghai Restaurant」設下六圍晚宴慶祝，以配合大碟《Shanghai New York》主題。當晚籮記多位好友也有出席，包括白雪仙、謝君豪及林珊珊等。而梁家輝、陳寶珠及劉嘉玲演罷《煙雨紅船》後亦趕往與籮記慶祝。席間，楊生更送了一隻價值＄１２３萬的Daniel Roth鑽表予籮記。相比起早前鄭伊健加盟英皇記者會時，楊生只借出＄２００萬鑽鏈替伊健造勢，戴完即還！實在差天共地！
放入保險箱收藏
當籮記接過名表後，即急不及待把它戴在手中展示給記者拍照。他高興地說：「我真係好開心！個心都不停咁跳！」之後他又小心翼翼地將它放回盒內，隨即到處拿給別人看，風騷非常！不過他表示只會把表放在保險箱，他說：「梗係唔會戴出去做騷啦！太貴喇！亦都唔會戴出街，我會放佢喺保險箱度。」此時籮記又忍不住大讚老闆說：「楊生送啲咁貴嘅嘢畀我，真係好驚！佢咁肯落本嚟做我隻碟，簡直滿足咗我嘅人生，又帶挈我搵錢，EEG真係隻金蛋！」
未Show十卡鑽戒
籮記前晚一身鑽石套裝跟名表非常配襯，身穿黑間條西裝的他，胸前配上淚型鑽石心口針，右手無名指戴有一顆三卡鑽戒，而左手除戴上一條鑲滿鑽石的手鏈外，食指上更戴有一隻三卡半的碎石鑽戒，氣派十足！對此，籮記一臉笑容地說：「呢啲都係以前買落嘅，我屋企仲有隻十卡鑽戒冇帶出嚟呀！」他還表示近日送了一粒四卡鑽戒給其助手兼救命恩人阿東，而阿東亦於席上展示給眾人看！