羅文身染怪病，生死懸於一線，但經過八日的留院醫治後，身體日漸康復。昨晨醫生巡房後，發覺籮記對新藥沒有抗拒，病情已告穩定，故准許籮記出院。不過，大病初愈的籮記並非第一時間返家休息，而是行街、購物、飲茶達六個鐘之多，一於玩番夠本。
昨午十二時，籮記就一身長皮褸襯黑長褲，手持一個毛毛熊公仔，再戴上他至愛的黑超，準備離開醫院。籮記精神飽滿、笑容滿面的跟記者打招呼後，即在助手阿東的陪同下，步出醫院登上其名貴的古董車。不過，籮記並沒有第一時間返回跑馬地寓所，而是直駛往他平時打躉的中環置地餐廳食午飯。
死過翻生行大運
貪食的籮記雖剛病愈，但仍不戒口大大啖食壽司及奶茶填肚，同時更「品嘗」他幾日都未抽過的香烟，籮記說：「真係快活過神仙！我唔會咁快返屋企住，因為我今次係大病，唔係細病，都係唔係咁老黎，所以一要出街行下，遊個大運先。」
午膳後，籮記就到附近的唱片舖買音樂唱片，跟着就過海到九龍修理眼鏡。籮記人緣極佳，朋友們得知他已出院後，即約他金鐘的高級餐廳再歎下午茶同傾閒偈，到五時多，籮記才歸家休息。篤信佛教的他，還上香感謝神恩保佑他大步檻過。
元氣大傷腳步浮
籮記表示：「有得出院覺得好開心呀，我真係覺得外面嘅世界好靚，我最怕冇自由嘛，今次出院費近二十萬，但我都覺得唔係太貴，嗰度啲醫生同護士都對我好好。（咁你而家係咪已經完全康復呀？）病情穩定啦，我仲要食兩個禮拜藥，每個禮拜見醫生二次，如果發燒就要再入院。（你精神好好喎！）我元氣大傷呀，我腳步浮浮，我都未試過上樓梯都無力，頭先見你哋影相，我扮嘢咋，我會日日煲燕窩補身啦。醫生話我個肝好弱，叫我唔好再飲酒，其實我都唔係隊酒嘅人，只係淺嘗美酒啫。」
近日有周刊報道指籮記是某羊胎素的長期捧場者，今次籮記患病，令人擔心是否與此有關？問籮記可有用羊胎素的習慣？籮記立即說：「黐線！打羊胎素咁貴，成二十幾萬一次我點捨得試呀！搽羊胎素膏就有。」