羅文於六日晚因為狂屙又嘔兼數度休克，情況危險而入養和醫院急救及留院七日。昨日「籮記」終於可以拆除身上的針筒，和以朋友身分探訪的記者見面。
原來「籮記」患上極罕有的怪病，醫生發現他的肝臟出現很多良性小血瘤，因為他狂嘔磨損了胃，導致腹部積了大量瘀血，血壓低於常人，需要輸三包血液急救，及打針、吊鹽水七日接受治療。雖然昨日見「籮記」表現得龍精虎猛，中氣十足，待今日醫生巡房後，若病情穩定的話他就可以出院返家休息。
肚暴脹至３６吋
「籮記」今次大病，可謂半隻腳踏入鬼門關，因為當時他曾休克及抽筋幾次，假若在失救的情況下，可能會中風，嚴重的話有半身不遂及死亡的可能，福大命大的「籮記」可以大步檻過，他好感激助手用手指救他一命。
大病後首次露面的「籮記」似乎身體完全康復，精神好好，不過因為要打殺細菌針，藥力又強又「拿」，故籮記的兩隻手背依然又紅又腫又痛，他說：「我個病係由空氣中嘅細菌所感染，導致肝臟生咗好多血瘤，我嘔後個胃大量流血，發脹到個肚好大，由三十吋腰大到三十六吋，個病名好怪，不如叫做『另類惡爺症』啦，入院後，啲血已經慢慢自己吸收番同排出身體外，而家已經由三十六吋腰減到三十四吋。真係報應呀，我一生最憎三樣嘢，就係飲暖水、食粥同無得玩，仲有我條三十六吋腰，真係想死！」
可能今日出院
問他嗰晚情況咁嚴重，有冇諗過可能會死呀？「籮記」淡然表示：「無諗過，我係好辛苦，但無諗過會死，我生命力、意志力咁強，仲有咁多嘢未玩，點會捨得死呀，醫生都話我意志力好強，本來我要留院兩個星期，而家一個星期就得，今晚我試過隻藥得嘅話，聽日就可以出院啦，我Check過晒身體，醫生話我啲血好乾淨，膽固醇正常，我又好感動有咁多好朋友關心我，尤其係助手阿東，因為佢見我抽筋，怕我咬脷，所以用手指塞入我個嘴度，我咬到佢手指都瘀晒都唔知。
「最好笑係，我入院時，啲朋友叫我着番條長褲，唔好着孖烟囪，但我好辛苦都記得叫助手攞太陽眼鏡俾我，呢個係明星嘅習慣，其實我戴咗個氧氣罩，都唔會有人認得我，連啲救護員都問我怕唔怕狗仔隊，使唔使用特別通道入院，我話咁辛苦乜都唔怕啦。」
要去狂野派對
「籮記」大病初愈應該好好休息，但記者接到電台通告他會接受昨晚陳海琪的凌晨時段訪問，他說：「因為之前我答應咗佢，如果一陣醫生俾我出院，我都會去。（但你不宜操勞喎？）我係有口齒嘅人，唔可以唔去，我都好想出去玩，我一定要去Rave Party（狂野派對）。」