ＬＭＦ大碟《大懶堂》雖被影視及娛樂事務管理處評為二級物品，罰款一萬元，可是ＬＭＦ昨日在出席生力啤的宣傳活動上聲言，不會就事件而作出自我審查，有需要時不排除會繼續講粗口。可是身為樂壇至尊的籮記（羅之暱稱）不但覺得他們被罰十分合理，更直指他們不應在公開場合上講粗口：「Ｘ人哋娘親就絕對唔啱！」
羅文身為樂壇至尊，一向以打扮前衞和言行大膽見稱，但昨日他就ＬＭＦ因在歌曲中有「粗口歌詞」，及沒有在唱片上加上警告字句而出售，被影視及娛樂事務處列為不雅唱片，因此被裁定判罰一萬元一事，籮記接受電台訪問時坦言認為裁決合理，他更表示，看見ＬＭＦ現場演出，令他感到十分不舒服。籮記說：「我覺得應該，我都有睇過ＬＭＦ嘅現場演出，不過時代唔同以前，已經變晒，粗口對我嚟講已經唔係一個大驚喜，喺嬲時講粗口係一個好嘅發洩方法，但公開演唱問候人哋娘親就唔啱，×邊個我都可以接受，但×人哋娘親就絕對唔啱，聽到我個心都好唔舒服，因為咁樣對人哋嚟講，係一個好大嘅侮辱。」
為慶祝新碟牙齒鑲鑽石
籮記繼續說：「我睇（謝）霆鋒演唱會時，本來好興奮，但呢隊樂隊出場後，我就覺得好唔舒服，因為佢哋喺公開場合咁樣講粗口係好唔啱，雖然時代係唔同咗，但都要有個界限，唔可以因為時代變咗就可以亂爆粗嘅！」另外，籮記在前日剛推出全新唱片，當他出現港台時，即向記者說：「張碟賣得好好，我為咗慶祝一下，特登用咗千九蚊喺隻牙上面鑲咗粒鑽石。」問他為何鑲白鑽石而不鑲其他顏色的鑽石？他即笑着說：「我都諗過！鑲錄色會畀人以為我有菜渣喺個口度，鑲紅鑽又以為我流牙血，所以都係白色好睇啲。」