由成龍發掘簽約StarEast、譚詠麟引薦加入環球的新人丁菲飛，破天荒獲StarEast和環球聯手力捧，昨日隆重舉行「飛音樂全接觸」，兩大公司的天王巨星均俾面出席支持，包括：成龍、譚詠麟、張國榮、陳百祥、羅文、李克勤、黃家強及余安安等，實行群星拱照丁菲飛，成龍、阿倫和阿叻更樂意做布景板，企喺菲飛背後拍手支持，令她受寵若驚，感動到眼有淚光！
風頭被巨星蓋過
由於到場的都是巨星，完全搶去菲飛風頭，令她由主角變配角，哥哥首先到場，即引起近百記者哄動，當阿倫出現時，兩位當年鬥餐死的巨星搭晒膊頭雞啄唔斷，之後他們更搭住菲飛膊頭影相，阿倫還笑言：「菲飛紅硬，我同哥哥咁紅搭住佢膊頭影相，佢點會唔紅？」
哥哥亦讚菲飛說：「佢音樂上好有才華。（有冇寫歌俾佢呀？）佢未搵我做呢樣嘢。（但你寫歌俾陳冠希唔怕俾人話偏心呀？）呢個係楊老細同大哥嘅面，我唔會偏心。」至於獲提名角逐「金馬影帝」，哥哥表示：「開心囉，我睇好梁朝偉，因為佢啱啱攞完康城影帝，但又試過剛攞完國際影展嘅王家衞都輸，所以大家都有機會。」另外，哥哥昨日接受記者訪問時，拒絕接受曾多番對他作出不實報道的「壹傳媒」訪問。
至於身兼StarEast股東和英皇歌手身分的羅文，不怕因捧對手公司菲飛場而令英皇不快，羅記坦言：「音樂係團結嘅，好嘅音樂應該支持，唔理邊間公司，就算同公司，唔好嘅音樂我都唔會支持。」