《肥姐闔府統請賓Ｆｕｎ演唱會》昨晚於紅館舉行，前晚肥姐一直於紅館與演出的嘉賓綵排到凌晨二時才離開，由於嘉賓多，所以綵排安排上，工作人員似乎忙不過來，昨晚就竟然忽略了羅文，令他苦候了二個多小時，羅記即場發脾氣！
欣宜識做幫按摩
羅記昨晚一早已經到了場館等綵排，一直等到近十二時，眼見一個個嘉賓也排好離開，也輪不到他排，而學友比他遲了一個小時才到，可是一到場馬上便可以排，反而他卻沒有人理過，羅記終於忍不住面黑黑發脾氣：「究竟幾時到我排？我坐喺度成晚，你哋都冇人理過我，有冇搞錯呀！當我唔存在呀？」工作人員知道羅記『發脾氣』馬上下來安撫，欣宜剛好排完，不知是否收到風羅記發脾氣，馬上乖乖地上前為羅記按摩，氹得羅記開始笑逐顏開，繼而肥姐收到風，又馬上過來又『呵』、又『親』又『攬』，又『錫』，使本來面黑黑的羅記再展笑顏，可是大會工作人員也不敢怠慢，學友一排完，馬上三、四請羅記上台，讓他先排。
出錯唔關阿肥事
事後記者問到羅記，羅記毫不諱言道：「我之前真係嬲！我十點前已經到咗啦！一直喺度等喎，冇人理過我！我知唔關阿肥事，佢哋話因為個編導唔知我已經喺度，咁就算啦，我都唔係咁小器…（喂！欣宜同你按摩，肥姐又攬又錫你，你重想點喎？）哈哈哈，欣宜實在係好乖，我錫到佢燶啦。」
肥姐就向記者笑道：「你哋唔好理佢，佢不過係詐詐嬌啫，邊有發脾氣，羅記呢個人，假如係發脾氣，一早已經離咗場啦，仲會坐喺度！大家咁老友，他等耐一啲都冇關係喇，學友係因為ＭａｙＭａｙ待產嘛，人哋要趕回去陪老婆啦，讓讓學友都係應該的。人哋第一胎自然緊張呀。羅記氹氹就冇事啦。哈哈哈……」