2000-03-16 明報 羅文性格似細路

羅文一向很受記者歡迎﹐皆因遇到任何事情他都是不吐不快﹐有嗰句講嗰句﹐每次必有一番精警笑料﹐所以記者就算不為採訪﹐也喜歡與籮記聊天。

在甄妮演唱會慶功當晚﹐籮記也是座上客﹐記者例牌跟他打牙骹﹐誰不知一見記者﹐他一反常態嬲爆爆﹕‘唔同你地講呀﹗同你地講笑又亂咁寫……’當時小精靈與在場記者都莫名其妙﹐被籮記一盆冷水照頭淋﹐但仍然一頭霧水﹕‘發生乜事呀﹐做乜咁嬲呀籮記﹖’細問之下﹐原來籮記好嬲有次講笑﹐話容祖兒屋企大火﹐都做幾日頭條﹐他仍然好勞氣﹕‘人地見你地悶講下笑﹐咁都寫﹐有無搞錯呀﹗’

記者見到籮記‘烈火紅紅’立即補鑊﹕‘唔好嬲啦﹐係一間有寫啫﹐都唔關我地事。’本來條氣重唔係好順﹐但一讚佢手上戴住隻十卡鑽戒﹐籮記即時不知幾咁開心﹕‘幾錢﹖唔好講﹐費事你垛又寫﹐已經係幾年前買﹐而家我唔會再花錢買珠寶﹐都無乜用﹐啲錢用嚟去旅行重好啦。下個月我去布拉格﹐六月會去倫敦住一個月﹐到時會去意大利同巴黎。’籮記認真識嘆世界。不過小精靈同時覺得﹐其實籮記性格好似細路仔﹐而且好鬼易氹。