樂壇前輩羅文昨日狂數徒兒不是，先指容祖兒搵貓似做戲，再責鄭伊健無本心，過年不打電話給他，羅文連環發炮，可算「老馬有火」。
繼早前甄妮大罵三位新晉歌手陳曉東、陳奕迅及張柏芝在機艙嘈吵後，羅文昨日到紅磡為甄妮個唱綵排時，亦對自己的徒弟有微言。他除指鄭伊健無本心外，更揚言容祖兒日前在火災後搵貓一幕似做戲。
籮記（羅文）反問記者：「你覺得Joey（容祖兒）好慘咩？我睇啲相一啲都唔覺佢慘，笑晒咁。搵貓都可以做頭條，做戲咩？有冇搞錯？我以為佢宣傳期過左唔使見人，點知火燭都做三日頭條，連港聞都做埋，真係睇都睇到嘔。」
「燒下仲紅呀」
身為Joey的師傅，籮記竟然說Joey博宣傳，一些關心說話也沒有，對此籮記解釋：「關心？我係咁樣關心，問佢邊度有燒親？初時有人同我講，話佢屋企火燭，仲話佢俾白布蒙頭。大吉利是，仲以為佢燒死左，佢宜家咁紅，燒下仲紅呀，我實叫佢紅左買份禮物畀我，仲叫佢養我一世。」
不再緊張徒弟
籮記冷嘲熱諷後，似乎有意補鑊，接狂讚Joey，他說：「Joey最乖、最聽話，唱歌又好。佢就最有心，成日都打問候我。係唔係最錫呢個徒弟？唔係佢，仲有邊個可以錫？伊健？好耐都冇見過佢，過年連電話都冇個。」
籮記續說：「以前我會好緊張啲徒弟練歌，宜家唔會囉，我為興趣，又唔係職業。我唔係戴老師，我姓羅。我又唔做經理人，做經理人辛苦過做歌手，宜家啲人又冇本心，好似應份咁，多謝都冇句。」
容祖兒經理人霍小姐，對於羅文的一番說話回應說：「可能係大家誤會左師傅嘅意思，其實佢係問點解祖兒屋企火燭會見咁多日報。祖兒死左隻貓，屋企又火燭，我點會搵啲咁嘅事做宣傳喎？只係因為啲傳媒朋友好關心祖兒，祖兒去邊都有車跟住佢，所以咪有咁多見報囉。」