洪朝豐和寶詠琴分手，昨日引來圈中人議論紛紛。早前曾被洪寶兩人指處事不公的黃霑，昨日往尖沙嘴出席《煇黃演唱會》記者會時，表示才子佳人通常都是分手結局。
圈中人意見：
白韻琴說：「我唔覺得出奇，因為我好了解洪朝豐嘅行為模式，佢同我傾過心事，但我唔方便將佢地講出，只能講一句佢係因誤會而結合，從清醒而分開，曾經快樂過咪得囉，希望寶小姐慳番啖氣，因為我了解到一個女人如果突然間失去伴侶，會好唔開心。」
黃霑：「才子佳人，通常都冇好結果。感情野好難講，我唔係感觸，我唔係才子。我識左琴姐姐好耐，佢係一個好女人。至於洪朝豐，喺我印象中，都算係叻仔。唉！可惜！可惜！呢件事教訓我要珍惜老婆。」
「最緊要自己開心」
章小蕙：「係咩？唔知呀，呢件事冇要回應，之前佢話告我件事，根本就告唔入，平時我講野好含蓄。宜家我只顧工作，冇時間去理是非，連拍拖都冇時間啦！」
洪朝豐好友顧紀筠：「我識左洪朝豐大約八年，之前就好熟落，近期都冇聯絡，佢同寶寶分手嘅消息都係睇報紙先知，可能係鬧交！希望佢快啲和好啦！」
寶詠琴歌唱師傅羅文：「我都係助手講我聽我先知，我同寶詠琴都好耐冇見。佢自從拍拖之後，好似放棄學業咁，好耐冇上學唱歌。冇話睇唔睇好佢地，最緊要佢自己覺得開心。我其實係一個心理醫生，點解洪朝豐唔睇我呢？」
新城ＤＪ邵國華：「唔突然！其實佢拍左十一個月拖，正常應該結婚，否則不進則退。今日分手，下星期可能又有新發展，目前未係事件結局，我一直睇好佢可以繼續落去。」