如果我話，「飢饉三十」係一件好有意義嘅善舉，相信你哋唔會反對啩？
今年係我第一年参與呢件咁有意義嘅盛事，而今年又係第一次喺維多利亞公園舉行，可以容納萬幾觀眾。
所以，零舍緊張。
何况，今年仲係歷年「飢饉三十」之中，最多歌手出席嘅一次添呢！
三月廿六號，星期六，陽光普照四圍大塞車，因此「飢饉三十」嘅開幕禮亦比原定時間遲咗半個鐘頭。
由宣明會方面嘅負責人一聲銅鑼就開始咗為時卅小時嘅捱餓時間，六百位營友喺呢卅個鐘頭之內，唔准進食固體食物，只准飲流質嘅嘢，嘗試捱餓嘅滋味。
嗰晚，我原本想將我個節目第一次播出嘅「小男人周記」，搬去維園直播，同營友一齊點吓唱，傾吓計，奈何天不造美，又抑或天公對同飢民洒下同情之涙？總之，天落雨，令到我唔可以喺營內直播，唯有搬入直播室做。
三月廿七日，天陰，大風，正如羅志強同潘芳芳話齋：
一日之內，經歷咗四季嘅天氣。而大伙兒就好擔心如果真係大吉利是落出雨，咁點呢？
在場工作人員好有信心咁開解我：我哋拜咗神㗎嘛！冇事嘅！
係喎！
果然，黃大仙保祐，一直都只係天陰有毛毛雨，咁嘅天氣，不單只冇破壞個表演，反而仲令到「飢饉三十」嘅意義更突出。
整個表演由下午三點開始，卅八位歌星樂隊輪流出場，過程緊湊。
因為商業二台係一個全中文歌嘅電台，對於推動樂壇不遺餘力，所以，呢個音樂會既有樂壇大哥大許冠傑、張國榮、羅文、鍾鎮濤，亦都有新秀如胡建中、夢劇院等等。
難得嘅係萬幾樂迷埋咗廿幾個鐘頭，肚餓啊營友，都堅持坐喺石屎地度足足三個幾鐘頭。
高潮一浪接一浪，羅文清唱嘅「幾許風雨」令全場人高舉雙手，互相捉實，場面感人。
然之後係鍾鎮濤同二台ＤＪ嘅「愛永遠萬能」而卅個鐘頭嘅捱餓經歷亦告一段落。
張國榮車住幾百個飯盒出來，自不然令全場樂迷熱血沸騰。
而大哥ＳＡＭ許冠傑領導萬人大合唱，就更加響徹維多利亞海港。多謝每一位有份參與「飢饉三十」嘅朋友，出年見！