有冇發覺上個禮拜，勁歌金曲節目之中，無端端多咗五分鐘鄭丹瑞嘅寫眞？
只見鄭丹瑞喺沙灘度扮晒斯文咁行來行去，時而托頭，時而沉思，究竟搞乜鬼？我又唔係歌星關我也事？且聽我慢慢解釋箇中原委。
原來十月份勁歌金曲大改革，除咗加入林穎嫻之外，仲加咗一啲其他嘅環節落去。其中一個環節就叫做五分鐘傳眞。
五分鐘傳真噏乜嘅呢？
每次我都會訪問一位歌手，不過內容就唔係一啲表面嘅公關訪問，而係一次内心嘅剖白。
聽吓啲歌星們講吓內心嘅世界。都係一件好事吖，相信大家都會接受咁嘅形式卦！？
好！開工搵邊個呢？
羅文！
我接到通告話星期五要去西沙灣拍羅文，於是個心就盤算，應該問佢一啲乜嘢問題呢？
正當我度緊內容嘅時候，深夜時份，勁歌金曲嘅助導阿東飛電急ＣＡＬＬ我，佢話羅文病咗而且病到唔行得，星期五訪問唔到佢！
咁就死嘞！咁夜咁急去邊度搵人替佢呢？
哈哈哈！都係勁歌金曲嘅幕後一班工作人員醒目。佢哋心念一轉，好，就先拍一拍呢個「五分鐘傳真」嘅節目主持人嘅寫眞先刺！
結果星期五一早出現係西沙灣嘅，就係呢個臨時替工鄭丹瑞。
不過能夠有機會喺螢光屏之上，講吓心事，唔使跟稿讀，全部都係自己嘅眞心說話又幾過癮㗎。
就正如我講過，我其實唔係咁鍾意搞笑，係真嘅！
我唔係咁願意做咁多瓣，不過條命要我咁亦係真嘅。
我相信如果唔作適當嘅誘導，冇人會肯當住咁多觀眾面前講真心話。亦係眞嘅。
今次就算係拋磚引玉，我講咗眞話，下次就輪到班歌星講眞說話。好，我哋一齊拭目以待，聽吓、睇吓佢哋表達眞嘅時候係點樣嘅。
唔同你講咁多，我要開始度吓啲問題嘞！呀，仲有不如就由下次起，我喺呢個專欄入面節錄佢哋嘅心底話呀！！