Kam仔建議羅記，不如搵個花旦做固定拍檔，對發展呢一瓣應有幫助。羅記話唔會主動相邀，機緣巧合碰到埋身就唔抗拒，好似阿嗲、阿姐咁，佢哋都有所屬拍拿，唔通去拆散人哋咩？

講到女歌星，佢始終欣賞「巨肺」甄妮，讚佢音色無得頂，而阿姐勝在努力後天工夫做得足。提到某位后級女歌星，佢就唔多欣賞佢嘅唱功，唱得一橛橛同埋噴氣太重，佢自己就聽唔順耳。都幾乎唔記得羅記現已為人師表，當然有資格批評人，不離老師口脗噃！

羅記早一排响泰國買咗兩個靚單位，係豪宅區，裝修完就可以入伙，講到咁好享受，Kam仔就叫羅記招呼吓我哋作客，至多我哋自己出機票啫，羅記一口答應，咁就記住呢句話先。

講到授徒，伊麵响樂壇發展順利，身為佢老師嘅羅記都與有榮焉啦。但羅記話伊麵上堂就孭住背囊跳跳紮咁，似個小學生，一放學仲開心，似雀仔飛出籠，真冇佢修。早於去年佢都睇好伊麵能夠响樂壇立足，咁睇嚟，羅文嘅眼光都唔差。睇吓仲有邊位千里馬被佢貼中？

有眼可見，羅記現時嗰一身肌肉幾夠件頭，隨意擺幾個香港先生咁嘅甫士都似模似樣，谷盡起嚟有四十一吋胸，勁喇嗒，楣姐丹妹都要企埋一面。自從佢宣布告別舞台，今次演唱會嘅門票去得仲快。九場嘅内部銷飛己滿瀉，遲落柯打嘅老友記，都要自己响外面買散飛。

早訂飛嘅至愛親朋，指定要「靚」、「好」又要「近」嘅握手位，點搞？羅記又真有本事，統統話包搞掂，就响内部訂購嘅門票上面，就寫明係「靚」、「好」、「近」、可以「方便握手」之類嘅字眼，寫到明囉，仲有唔係？佢大大聲話無呃人架，但靚唔靚？好唔好？見仁見智啦！握唔握到手？自己執生囉，係咪咁話？

反正咪都未封，就算羅文自己都難預計。羅文唔做歌星專注教唱，行內價目係每堂一千蚊，仲要預Book免致撞期難兼顧，呢個價目算公道，以佢嘅聲名同身價，絕對係名師級，跟佢唱嘅係唔係做到高徒就屬後話。羅文為人守時同勤力，佢對門生最基本要求都係以呢兩樣為主，就算遲交學費都係其次，遲到同埋懶惰之輩，遲早會被逐出師門，醒定啲啦好！

在香港樂壇這情況一直出現，而且更成為香港樂壇較獨特的現象！或者香港人真的較「循規蹈矩」，夠年齡就要退休，唱歌也不例外；結果告別樂壇這玩意，亦成為歌手生涯的一部分。

最近羅文的告別樂壇宣言，也引來不少話題，亦叫人正視了香港樂壇現存的問題。

做歌手是否有年齡界限呢

這絕對不會，因為例子多的是；在外國，Frank Sinatra唱到今天，雖然病重，但痊癒後照樣會唱！香港樂壇，粤劇大佬倌靚次伯，不是一直獻身藝術舞台，叫人肅然起敬！

為何香港影壇有甘草，但樂壇只有鮮草？這其實暗存一個不健康現象！

香港樂壇說大不大，但卻成為全球華人對流行音樂的焦點，這其實更對一些較有歌齡的歌手有利；因為海外華人（香港人）往往沒有如身處香港的追緊流行節奏，故移居海外的香港人，往往會更忠心於他們昔日偶像，他們的舊歌固然成為移民「安心藥」，而他們的新作也會越洋購買，這其實説明了，一位成功的歌手，他們的歌唱生命可以很長遠，但問題卻出於唱片公司；今日唱片公司運作，似乎有新無舊，縱然旗下有位具分量的「老牌」歌手（十年以上在港也可拿「老人牌」。），但卻往往被唱片公司投閒置散，為他們出唱片卻沒有市場眼，只是硬把新東西用在舊人身上，結果令到「老牌」歌手風格更為尷尬。

小丑性宣傳令老牌歌手尷尬

其次，香港樂壇在宣傳手法上，是遊戲至上；歌手出唱片自然要上上電視做做頂波，扮扮動物叫······在電台要甘於被節目主持人的名咀盡咀一番，這是宣傳常規；但老牌歌手出碟，他們也要走這條路，結果當新舊兩派一同出現，就顯得格格不入，更形成了兩派的年齡差距明顯，這與羅文今次所言，前輩歌手不被尊重之説，不無理由。

而説到後輩歌手對前輩的不尊重，其實又何必看重；一則樂壇新丁是四方八面而來，而樂壇又非少林寺，沒有先後師兄師弟之分，故一些資歷淺的樂手，由於心裡無輩份觀念，甚至乎前輩的歌齡雖比後輩年齡還大，這隔膜根本無從補救，彼此看法不同也形成後輩不尊師重道，這點放開些可以解決。

「羅文事件」感可惜

以今日作告別舞台，他日將專注幕後，其實無需表態，以羅文之舞台經驗及功架，在香港樂壇上可謂絕無僅有，宜古宜今，但無可否認在今日年輕一輩看來是有點舊派，有點誇張，但這已成他的表演方式；如果今次是最後一役，似乎太早封了出路；我反對樂手「退休宣言」，但更反對「食言」，如果一句：「我説錯了！」而再踏舞台，反而，要為自己説話負責。

今年初羅文推出的紀念唱片，反應極理想，亦説明了樂迷對Roman的舊歌尊重及欣賞！

不是自己「馬後炮」，看見Roman此碟，將新舊歌曲集齊再唱，有點Anthology味道，已看出他一心以此為最後一擊，但萬想不到會將舞台視為告別！

羅文是本港少有一位真正具Showbiz的出色歌手，缺少一點也難臻完美。

真的，我一直頗尊重他的努力不懈，但今次如真的退出，我對他有了折扣了！

可否重新再作決定？

羅文可以做樂壇甘草······甚至鮮草！

黃啟聰

羅文聲言決定退出絕非講笑，所以這晚擔任大會司儀的曾志偉亦一本正經唔敢講笑，在極富懷舊，滲入溫情又帶點傷感的氣氛底下，坐主家席的籮記百感交集，真情湧現。

當他的前度舞台老拍檔肥姐與阿姐翻揭他的陳年往事、慫恿他食言破戒、更笑謔他「姣婆唔守得寡」必會復出，籮記報以不置可否的笑容無從答辯。

本來答允籮記出席「星光的加冕」其中兩位重頭嘉賓梅艷芳與蕭芳芳，當晚均缺席，阿梅抱恙在身；芳芳有事要辦，原先安排阿梅與籮記鬥妖鬥唱那一Part，另由已經反璞歸真的李蕙敏打回原形以妖Look獨唱「波斯貓」代替。

羅文班愛徒伊麵、家棟、小環、黎姿同麥偉強當然要出席師傅嘅加冕Show，仲要努力唱好啲免令佢老人家丟臉，可能緊張過度，呢班門生呢晚都唔係點笑，面口似乎梗咗啲！

三大天王除咗華仔要開個唱其餘都到齊，尤其Leon專誠由星洲趕返助威，兩年前佢同籮記合作過「阿Sir早晨」，彼此算係熟過嚟！

Leon响散Band前趕得切出現，睇佢滿頭大汗咁跑入會場，又係誠意嘅表現！

後輩如三大天王學友、城仔與黎明既嬲籮記未徵求他們同意自行退出，復又表示尊重他老兄的決定。門生如伊麵、海味、小環與黎姿等憑歌寄意感謝師父教導，羅文報以心領的眼神，微顫的唇角一切盡在不言中。

同輩的阿叻與阿B獻唱籮記的「前程錦繡」，輕鬆的Disco beat卻beat得籮記眼泛淚光，心是欲斷難斷。

羅文以招牌歌「幾許風雨」與「感激説話千百句」答謝各位這些年來對他的厚愛，及誠意的加冕。

但他會否被肥姐言中難守寡遲早會復出呢？要姣便姣隨他喜歡，籮記！我們並不介意你會有變節的一日！

后冠已為你準備好，一致認為評價是公正合理，請籮記放心佩戴。

參與這次義演的愛心大軍包括甄妮、羅文、杜德偉、羅嘉良、趙學而和鄧梓峰。除了羅嘉良和趙學而，其餘四位早在六月十日就要抵達美國。點解？因為他們要參與較早前一個名為「香江燦爛荷里活」的宣傳香港活動，所以要先往荷里活，然後才乘內陸機再赴紐約。連做兩個騷，他們仍覺精神奕奕，皆因有愛心支持。甫踏出紐約甘迺迪機場，愛心大軍立即展開緊密的愛心行程。

羅文、甄妮溫馨洋溢

六月十四日，他們一早就抵達紐約下城醫院準備作親善探訪。期間他們探訪了一對雙胞胎嬰兒，甄妮姐姐抱著ＢＢ顯得愛不釋手，連羅文都被她那種母愛感染而嚷著要親親ＢＢ，場面溫馨，令人難忘。

羅嘉良受華僑歡迎

同日下午，愛心大軍又趕到紐約孔子大廈廣場參與義賣活動。眾星們被熱烈的紐約華人迷哥迷姐

包圍，非常哄動。尤其是羅嘉良，被戲迷重重圍困。只聽見「徐家立」、「徐家立」嗌個不停。原來天地男兒在紐約非常受歡迎，羅嘉良飾演的大奸角徐家立深入民心，自然成為偶像級人馬。

忙了一整天，翌日他們又要馬不停蹄，趕往新澤西州的大西洋城印度宮殿賭場準備十六號的義演。筆者連同監製、導演夜闖籮記房間，竟然發現羅嘉良正在苦練籮記的生平絕學——壞「情人舞」步十二式，可見眾藝人對是次演出的認真和投入。

兩猛男掀熱潮

到十六日正式演出，籮記同羅嘉良同台演出「壞情人」自然贏得台下無數掌聲，但勢估唔到籮記在歌曲完結時擺咗一個拗腰甫士，然後就郁都唔郁，搞到身旁的羅嘉良不知所措，呢個動作維持咗大約一分鐘，咁突如其來嘅整蠱，台下的觀眾笑聲震天。由於當日是父親節，羅文獻唱一曲「親情」以歌頌父愛，逗得在場的父親輩樂透了半天。

趙學而大送香吻

此外，趙學而亦將香吻送予在場的一位男觀眾。咁大犧牲？非也，她只是將唇印吻在紙卡上再送出去啫。總而言之，當日演出十分精采，觀眾們都認為既能夠做善事，又能欣賞眾星演出足足三個多小時的演唱會，絕對是超值。連同義賣及義演，整個慈善活動總共籌得五十萬美圓成績美滿，為無綫電視海外慈善活動的歷史，寫下光輝的一頁。

無論是當年的「錦繡前程」、「小李飛刀」、「激光中」、「幾許風雨」、「波斯貓」，又或是近年的「壞情人」、「孔子曰」，籮記在台上的舞姿、台風、歌聲，相信大家記憶猶深，還想再睹他的精彩演出？無問題，羅文的演唱會將於九月十九日起，一連六晚在紅館舉行，到時，記得帶埋你哋嘅壞情人一起去噃！不過千祈唔好帶波斯貓呀！唔畀入㗎！