羅文昨午在林珊珊陪同下，到中環剪髮扮靚靚驅趕衰氣。珊珊剛由美國返港，一落機就去探羅記，雖然羅記連日來都要面對記者追訪，但他一直抱持輕鬆的態度，羅記透露其身體狀況ＯＫ，他說：「我個傷口好得好快，只係有啲癢，如果個傷口好得靚，唔使返醫院拆線。」
有傳羅記個肝十幾年前已經有事，羅記否認話：「邊有十幾年，一向肝內臟係弱啲，本身冇小心打理。」所以羅記奉勸記者們小心保重身體，他表示已準備接受中藥治療，同時他亦會如常工作，稍後他就會往台灣，但日期未定。
老闆擔心到瞓唔着
楊受成昨日在記者面前亦大讚羅文，他說：「我未遇過一個人有咁嘅重病，仲可以咁樂天，最初知道佢個情況唔好，真係瞓唔到好擔心，我知佢好想去台灣宣傳佢隻國語碟，但我同公司都唔主張，如果佢真係要去，我要佢同人講係佢自己想去，唔係公司迫佢去。」
查小欣讚中氣十足
此外，昨晨在「茶煲裏的查篤撐」節目中，主持人查小欣亦有轉述同羅文通過電話的談話內容，查小欣形容羅記好生鬼，中氣十足，查小欣話：「羅記話最唔鍾意啲人當佢病人，問佢有冇戒口？佢就話：「戒乜嘢口，中醫都冇叫，肥豬肉、鵝鍾意嘅都食得，烟都冇戒，身邊個個朋友都叫我戒，仲俾我鬧添！」
查小欣續說：「佢仲話好彩冇做手術，依家睇緊中醫，有信心醫好。」小欣透露跟羅記的對話中，對方有好多粗鄙的助語詞，她說：「佢仲笑話驚我錄音嘛。羅記話知道好多傳媒朋友關心佢，但有關佢病嘅話題應該停，佢唔想再講，我話佢耳仔咁長，一定冇事，佢即刻啋！佢話從來唔覺得自己有事、有病，佢冇諗過死。」